Grekııada tótenshe jaǵdaı jarııalandy
AFINY. QazAqparat -Qurlyqtyq Grekııa oblysynyń gýbernatory Kostas Bakoıannıs jeksenbide Evbeıa aralyndaǵy Dırfıon-Messapıon mýnıtsıpalıtetinde alapat orman órtine baılanysty tótenshe jaǵdaı jarııalady, dep habarlaıdy TASS.
«Jergilikti ózin-ózi basqarý organdary órtti sóndirýge kómektesip jatyr. Qazir ǵana tótenshe jaǵdaı jarııaladyq. Barshany polıtsııa men órt sóndirýshilerdiń nusqaýlaryn oryndaýǵa shaqyramyz», - dep jazdy Bakoıannıs Feısbýktegi paraqshasynda.
Órt sóndirýshilerdiń sózine qaraǵanda, Daǵdarystardy basqarý jónindegi keńes qurylyp, ishki ister mınıstri Panos Skýrletıstiń qatysýymen jıyn ótkizgen.
Ázirge órttiń negizgi oshaǵyn aýyzdyqtaýdyń sáti túspeı otyr. Órt oshaǵynda ornalasqan Kondodespotı kenti, oǵan kórshiles otyrǵan Stavros eldi mekeni evakýatsııalanǵan. Evbeıadaǵy órtti sóndirýge 186 adam, 62 tehnıka jumyldyrylǵan.
Bılik ókilderiniń aıtýynsha, Evbeıadaǵy órt saldarynan zardap shekkender joq, óńirde tek eki úı janyp ketken. Eldi mekendi aınala ósip turǵan ormandar jalyn qushaǵynda qalǵan. Onyń ústine jeldiń kúsheıýi órt sóndirý jumystaryn qıyndata túsýde.
Eske sala keteıik, Grekııada bıylǵy jazda alapat órtter tolastamaı tur. Ótken aıdyń aıaǵynda Attıkada órt saldarynan qaza tapqandardyń sany 70-ten asqan bolatyn.
