Grekııada táji tóńkerilip kıgizilgen áıeldiń erekshe qabiri tabyldy

ASTANA. KAZINFORM — Grekııanyń Beotııa aımaǵynda arheologtar antıka dáýirine tán erekshe qorym tapty. Onda tóńkerilip kıgizilgen dıademasy bar asyl tekti áıel jerlengen. Bul týraly Grekııanyń Mádenıet mınıstrligi habarlady, dep jazdy TASS.

Qazba jumystary Kopaıs kóli mańynda, Apollon Ptým qasıetti orny men ejelgi Akrefııa qalasynan 6 shaqyrym jerde júrgizilgen. Bul aýmaqta arhaıkalyq jáne klassıkalyq kezeńderge jatatyn zırattar men bekinisti qonystyń arhıtektýralyq qaldyqtary anyqtalǵan. Zerttelgen 40 qabir bul óńir turǵyndarynyń áleýmettik mártebesi joǵary bolǵanyn kórsetedi. Alaıda arheologtardyń nazary VII ǵasyrdyń ekinshi jartysyna jatatyn «tóńkerilgen dıademasy bar hanymnyń jerleýine» erekshe aýdy.

Aldyn ala zertteýler boıynsha, qabirde 20–30 jastaǵy áıel jerlengen. Onyń basyna mártebesiniń belgisi retinde úlken qola dıadema kıgizilgen. Ol chekanka ádisimen jasalyp, arystan men urǵashy arystannyń geraldıkalyq beınelerimen jáne Kún beınesindegi úlken gúl tárizdi sándik belgimen bezendirilgen. Alaıda dıadema ádeıi tóńkerilip qoıylǵan, nátıjesinde arystandar beınesi teris ornalasqan.

Mádenıet mınıstrliginiń málimetinshe, tóńkerilgen táj qazirgi túsinikte bılikten aıyrylý nemese quldyraýdy bildiredi. Bul jerleý orny patshalyq bılik álsirep, elde olıgarhııa men aqsúıekter yqpaly kúsheıe bastaǵan ótpeli kezeńge sáıkes keledi. Qabirden tabylǵan kóptegen qola syı-sııapattar áıeldiń baı ári bedeldi tulǵa bolǵanyn dáleldeıdi.

Akrefııa — Beotııadaǵy kóne qala, ol mıfologııa boıynsha Apollonnyń uly negizin qalaǵan dep esepteledi. Qala Kopaıs kóliniń jaǵasynda ornalasyp, munda Dıonıs hramy men Apollon Ptýmǵa arnalǵan qasıetti oryn bolǵan. Qazirgi tańda onyń qırandylary zamanaýı aýyldyń mańynda saqtalǵan.

Eske sala ketsek, buǵan deıin Ýelste ortaǵasyrlyq qupııa qorym tabylǵanyn jazǵanbyz.