Grekııada stýdentter memlekettik telearnanyń stýdııasyn basyp aldy
ASTANA. 26 qyrkúıek. QazAqparat - Bir top stýdent jeksenbi kúni, 25 qyrkúıekte, grekııalyq memlekettik NET telearnasynyń stýdııasyna basyp kirdi, dep habarlaıdy Lenta.rý Agence France-Presse-ke silteme jasap.
Telestýdııa ornalasqan Afına ǵımaratyna shamamen 50 adam basyp kirdi, dep áńgimeleıdi polıtsııa ókilderi. Olar telearna basshylyǵynan joǵary bilim reformasyna qarsy narazylyq bildirý úshin efır bólýdi talap etken.
Keshki jańalyqtar toptamasynyń ornyna derekti fılm bergen NET basshylyǵy stýdentterdiń talabyn oryndaýdan bas tartty. Osylaısha telearna osydan úsh jyl buryn bolǵan oqıǵanyń qaıtalanýynan qutylyp ketti. Onda bir top anarhıster tikeleı efır arqyly jańalyqtar júrip jatqan stýdııaǵa basyp kirip, kamera aldynda halyqty kóteriliske shaqyratyn úndeýler jazylǵan plakattaryn jaıǵan bolatyn.
Sonymen qatar sol jeksenbi kúni polıtsııa Afıny ortalyǵynda parlament ǵımaratynyń aldynda ótken narazylyq aktsııasyn taratý úshin kózden jas shyǵaratyn gaz paıdalanýǵa májbúr boldy. Polıtsııany mundaı qadamǵa narazylyq aktsııasyna qatysýǵa jınalǵan eki myńnan astam adamnyń ortalyq kóshelerdiń birin jappaq bolǵan áreketteri ıtermelese kerek.
Grekııada narazylyq sharasynyń kelesi tolqyny el úkimeti 21 qyrkúıekte ekonomıkany daǵdarystan qutqarýdyń jańa josparyn usynǵannan keıin týyndady. Josparǵa sáıkes, zeınetaqy mólsheri qysqartylyp, salyq mólsheri, kerisinshe, ulǵaıtylǵan. Daǵdarysqa qarsy jospardyń qabyldanýy - Grekııanyń HVQ men Eýroodaqtan 8 mıllıard eýro kólemindegi kezekti kredıttik transhyn alýy úshin qoıylǵan basty talap.
