Grekııada Reseı azamaty 118 jylǵa bas bostandyǵynan aıyryldy

ASTANA. KAZINFORM — Grekııa soty Reseı azamaty Vladımır Kotelnıkovty zańsyz kóshi-qondy uıymdastyrýǵa kináli dep taýyp, 118 jylǵa bas bostandyǵynan aıyrýǵa, sondaı-aq 500 myń eýro aıyppul tóleýge úkim shyǵardy, dep habarlaıdy DW. 

Bul týraly reseılik birqatar BAQ Sheteldegi otandastardy qoldaý jónindegi Biryńǵaı úılestirý ortalyǵynyń vıtse-prezıdenti Ivan Melnıkovtyń sózine silteme jasap habarlady.

Onyń málimetinshe, 37 jastaǵy Chelıabınsk týmasy Kotelnıkov Grekııaǵa jumys babymen kóship, Jerorta teńizi aımaǵynda týrısterdi tasymaldaıtyn ıahtaǵa teńizshi bolyp jumysqa ornalasqan. Melnıkovtyń aıtýynsha, Kotelnıkovtyń jumys berýshisi zańsyz mıgranttardy týrıster retinde kemege otyrǵyzyp, ony aldaǵan, sonymen qatar qorqytyp, qujattaryn tartyp alǵan. Kotelnıkov 2024 jyly 11 maýsymda Rodos aralynyń mańynda tutqyndaldy. Onyń áıeli men balasy Reseıde qaldy.

Melnıkov munyń jalǵan shema ekenin, nátıjesinde Túrkııaǵa jumys izdep kelgen reseılik azamattar «alaıaqtardyń toryna túsip qalǵanyn» aıtady.

– Olar Túrkııadan Grekııaǵa zańsyz ımmıgranttardy teńiz arqyly tasymaldaýmen aınalysady, kelgen soń jaı ǵana qamaýǵa alynady, - dedi Melnıkov.

Mash Telegram arnasyna bergen túsiniktemesinde ol taǵy 36 reseılik Grekııanyń túrmelerinde osyndaı aıyppen otyrǵanyn aıtty.

Sheteldegi otandastardy qoldaý jónindegi Biryńǵaı úılestirý ortalyǵynyń vıtse-prezıdentiniń aıtýynsha, ol Reseı syrtqy ister mınıstrligine Kotelnıkovty bosatýǵa kómektesýdi surap úndeý joldaǵan.

Eske sala keteıik, keshe Reseıde jolaýshylar ushaǵy apatqa ushyrady.