Grekııada poıyzdar soqtyǵysyp, 32 adam mert boldy
AFINA. Sınhýa – QazAqparat – Grekııanyń ońtústiginde seısenbi kúni eki poıyz soqtyǵysty, mert bolǵandar sany 32 adamǵa jetti, taǵy 85-i jaraqat alǵan. Bul týraly sársenbi kúni Grekııanyń órt sóndirý qyzmeti málimdedi, dep habarlaıdy QazAqparat qytaıdyń Sınhýa agenttigine silteme jasap.
Órt sóndirý qyzmetiniń resmı ókili Vasılıos Vatrakoıannıstiń málimdeýinshe, jaraqat alǵan adamdardyń 53-i aýrýhanaǵa jatqyzylǵan.
Qutqarýshylar Tembı mýnıtsıpalıtetinde tún ortasynda júk poıyzymen soqtyǵysqan jolaýshylar poıyzynyń qırandylarynyń astynan aman qalǵan adamdardy izdep jatyr, dep habarlady AMNA agenttigi.
Oqıǵanyń jaı-japsary tergelip jatyr.
«Birneshe vagon relsten shyǵyp ketip, tórteýi órtengen. «1 jáne 2-vagon joq. Soqtyǵys qatty bolǵandyqtan olar joldan ushyp ketken», - dep habarlady Fessalııa provıntsııasynyń gýbernatory Kostas Agorastos ERT memlekettik telearnasyna.
Grekııanyń Qyzyl aı qoǵamy zardap shekkenderge kómek kórsetý úshin Larısa qalasyndaǵy apat ornyna jaqyn mańdaǵy ortalyq alańda qan tapsyrýǵa shaqyrdy.
