Grekııada ótken kınofestıvalde qazaqstandyq fılm júlde aldy
ASTANA. QazAqparat - Otandyq rejısser Ádilhan Erjanovtyń «Dúnıege degen beıjaılylyq» atty týyndysy Afına qalasynda ótken «31-shi Halyqaralyq Eýropalyq kınolarynyń panoramasy» kınofestıvalinde júlde aldy, dep habarlaıdy Qazaqstannyń Grekııadaǵy Elshiliginiń baspasóz qyzmeti.
Grekııa astanasynda 22 qarasha men 5 jeltoqsan aralyǵynda ótken is-sharada elýden astam kórkem jáne qysqametrajdy fılmder kórsetildi.
A.Erjanovtyń dramasy atalǵan konkýrstyń fınalyna ótip, qazylar alqasy 11 kınotýyndynyń (2 grekııalyq jáne 9 sheteldik) ishinen úzdigin tańdady.
Mádenı dodaǵa óz kınolentalaryn joldaǵan elder qatarynda Grekııa, Frantsııa, Qazaqstan, Polsha, Nıderlandy, Reseı, Germanııa men Horvatııa boldy.
«Dúnıege degen beıjaılylyq» fılmi eki jas keıipker Qýandyq pen Saltanattyń aýyldan úlken shaharǵa kelip, qoǵamnyń zamanaýı syn-tegeýrinderine qarsy tótep berý qadamdaryn baıandaıdy.
Júldegerlerdiń esimderi 5 jeltoqsanda anyqtaldy. «Úzdik fılm» nomınatsııasyn Ádilhan Erjanovtyń týyndysy men reseılik rejısser Elızaveta Stıshovanyń «Súleımen taýy» fılmi ıemdendi.
Festıvaldiń jabylý saltanaty «Kann kınofestıvaliniń» jeńimpazy - basty rólge qazaqstandyq aktrısa Samal Eslıamova túsken Sergeı Dvortsevoıdyń «Aıka» týyndysynyń kórsetilimimen aıaqtaldy.
