Grekııada ótken halyqaralyq jarysta Qazaqstan gımnastary 9 altyn aldy

ASTANA. KAZINFORM — Grekııada kórkem gımnastıkadan dástúrli 10-shy Afrodıta kýbogy halyqaralyq týrnıri qazaqstandyqtar úshin sátti aıaqtaldy.

Qazaqstan gımnastıka federatsııasynan málim etkenindeı, qazaqstandyq sportshylar 9 altyn, 5 kúmis jáne 1 qola medal jeńip aldy.

Atap aıtqanda, Erıka Jaılaýova kópsaıysqa qosa lenta jattyǵýynda 26.550 upaımen aldyna jan salmasa, Mılana Parfılova sheńber saıysynan (26.650 upaı) chempıon atandy.

Aıym Meıirjanova kópsaıystan úzdik úshtikti túıindese, lenta jattyǵýynda ekinshi nátıje (25.700 upaı) kórsetti.

E.Jaılaýova doppen jattyǵýdan kúmisti enshilese, toptyq básekede Astana komandasy úzdik shyǵyp, shymkenttikter ekinshi orynǵa kóterildi. Astanalyqtar komandalyq taǵy bir básekede altynnan alqa taqty.

Jastar arasynda Aqmaral Erekesheva altyn men kúmis medalǵa qol jetkizse, Aıǵanym Rysbek te jeńimpaz atandy.

Eske sala keteıik, budan buryn sporttyq gımnastıkadan álem kýbogy kezeńinde Narıman Qurbanov altyn, Zeınolla Ydyrysovtyń kúmis alǵanyn jazǵan bolatynbyz.