Grekııada órttiń kesirinen Olımpııa qalashyǵynyń turǵyndary evakýatsııalandy
AFINA. QazAqparat – Sársenbi kúni Grekııa aýmaǵyndaǵy órt saldarynan Ejelgi Olımpııa qalashyǵynyń turǵyndary evakýatsııalandy. Rekord ystyq saldarynan 24 saǵat ishinde elde 100-den astam jerde orman órti shyqty, dep habarlaıdy QazAqparat The New York Post-qa silteme jasap.
Ejelgi Olımpııa – ejelgi Olımpıada oıyndary bastalǵan jáne kóptegen ǵasyrlar boıy ótkizilgen oryn.
520-dan astam órt sóndirýshi, 17 komanda, 150 órt sóndirý kóligi, toǵyz tikushaq jáne jeti ushaq dereý órtti sóndirýge jiberildi.
Qazirgi málimet boıynsha, 1 250 gektar jer órtenip, 76 úı men 27 kásiporynǵa qatty zaqym kelgen, 18 úı ishinara buzylǵan.
Greek Reporter-diń habarlaǵýynsha, Gerakleıa, Pýrnarı, Pelopıo, Platanos jáne Kafkanııa aýyldarynyń turǵyndary da evakýatsııalanǵan.
«Órtti sóndirýge bar kúsh-jigerimizdi salamyz», - dedi Azamattyq qorǵanys bastyǵy Nıkos Hardalıas (Nikos Hardalias) Associated Press-ke.
«Eń qıyny – alda. Aldaǵy kúnder men aptalar odan da aýyr bolady. Bizdiń basty maqsatymyz – adamdardy qorǵaý», - dedi ol.
Haradalıas 24 saǵat ishinde 118 orman órti shyqqanyn aıtty. Bılik Olımpııa mańyndaǵy Peloponnestiń ońtústik aımaǵyndaǵy turǵyndardy evakýatsııalaýǵa májbúr boldy.
Evııa aralynan 90-ǵa jýyq adamdy qaıyqpen evakýatsııalaýǵa týra kelgeni atap ótildi.
Órt sársenbide Grekııadaǵy aýa temperatýrasy 45 gradýsqa jetken kezde bastaldy. Bul – 1987 jyldan beri tirkelgen eldegi baqylaý tarıhyndaǵy eń joǵary temperatýra.
B.z.d. 776 jyldan b.z. 393 jylǵa deıin oıyndar ótkizilgen ejelgi Olımpııa 2007 jyly orman órtterinen zardap shekken bolatyn. Ol kezde tilsiz jaý ondaǵan adamnyń ómirin qıǵan edi. Sol kezde ejelgi jerlerdiń qırandylary qutqarylǵan.
