Grekııada órt baqylaýdan shyǵyp ketti: 2 qalanyń turǵyndaryn evakýatsııalaýda
AFINY. QazAqparat – Afıny qalasynan soltústikke qaraı oryn alǵan orman órti Grekııadaǵy uzaqqa sozylǵan aptap ystyq saldarynan baqylaýdan shyǵyp ketti, dep habarlaıdy QazAqparat Reuters agenttigine silteme jasap.
Grekııanyń Afıny qalasynyń soltústiginde ornalasqan Votonas jáne Marafon qalalarynyń turǵyndaryn evakýatsııalap, tańǵy 5-ke qaraı jaǵalaýǵa barýǵa pármen berildi.
Órt sóndirý qyzmeti surapyl jalynnyń negizgi oshaǵy túrli baǵyttarǵa taralyp otyrǵan birneshe aǵyndarǵa bólinip ketkenin málimdedi. Órt sóndirýshiler sondaı-aq Attıka men Grekııanyń basqa bóliginde boljanyp otyrǵan qatty jelge daıyndalyp jatyr.
Evııa aralynda jaǵalaýdaǵy kúzet qyzmeti patýrldik katerler jáne jekemenshik kemelermen birlesip, teńiz arqyly júzdegen adamdy evakýatsııalaý boıynsha kólemdi operatsııany júrgizdi.
Órt sóndirýshiler búgin sý bombalary tıelgen ushaqtar men tikushaqtardyń kómegimen Afıny mańyndaǵy órttiń birneshe oshaǵyn sóndire alǵany habarlanyp otyr. Alaıda aptap ystyq olardyń qaıta jandanýyna sebep boldy. Qazirgi ýaqytta bul qalany soltústik Grekııamen baılanystyryp otyrǵan eldiń bas kólik magıstralinde qozǵalys toqtatyldy, buǵan ekıpajdardyń joldy jalynnyń taralýyna bóget retinde paıdalanýǵa árekettengeni sebep bolǵan.
Eske sala ketsek, Grekııada orman órti sońǵy qyryq jyldyń ishinde bolǵan eń qatty ystyq kún raıynyń saldarynan boldy. Eldiń kóptegen aýdandarynda aýanyń temperatýrasy 44 gradýstan asyp otyr.
