Grekııada masaǵa qatysty qaýip kúsheıdi: Batys Nil vırýsy kóbeıgen
ASTANA. KAZINFORM — Grekııada Batys Nil vırýsyn juqtyrý jaǵdaılarynyń ósýine baılanysty masadan qorǵaný sharalaryn kúsheıtýge shaqyrdy, dep habarlaıdy Anadoly.
Grekııanyń Qoǵamdyq densaýlyq saqtaý ulttyq uıymy (EODY) masalardyń belsendi kezeńinde vırýs juqtyrý jaǵdaılary eldiń kez kelgen óńirinde tirkelýi múmkin ekenin habarlady.
Vedomstvo eń aldymen qaýip tobyna jatatyn azamattardy saqtyq sharalaryn qatań saqtaýǵa shaqyrdy.
Elde tirkelgen jaǵdaılardyń edáýir bóligi Shyǵys Attıka óńirine, atap aıtqanda Markopýlo jáne Spata mýnıtsıpalıtetterine tıesili.
Al Afına ulttyq jáne Kapodıstrııa ýnıversıtetiniń (EKPA) medıtsına fakýltetiniń gıgıena jáne epıdemıologııa professory Gıkas Maıorkınıs Grekııanyń ERT memlekettik telearnasyna bergen suhbatynda aýrý juqtyrý jaǵdaılarynyń ósýine naqty ne sebep bolǵanyn ázirge anyqtaý múmkin bolmaǵanyn aıtty.
Professordyń sózinshe, vırýs masalarǵa negizinen aýrý juqtyrǵan qustardan beriledi. Onyń aıtýynsha, qarǵalar men saýysqandar vırýs aınalymynda erekshe ról atqarady.
Maıorkınıstiń pikirinshe, aýrý juqtyrý jaǵdaılarynyń kóbeıýine 2023 jyly Fessalııa óńirinde bolǵan «Danıel» daýylynan keıin qustardyń meken etý ortasy men kóshi-qon baǵyttarynyń ózgerýi sebep bolýy múmkin.
Sonymen qatar professor 50 jastan asqan adamdardyń, ımmýndyq júıesi álsiregen jáne sozylmaly aýrýlary bar azamattardyń aýrýdyń aýyr ótýi men ómirge qaýip tóndiretin asqynýlardyń damý qaýpi joǵary ekenin atap ótti.
— Egde jas — aýrýdyń aýyr ótýi men ólimge ákeletin asqynýlardyń negizgi qaýip faktorlarynyń biri, — dedi maman.
Ol qaýip tobyna jatatyn azamattardy masa shaǵýynan barynsha muqııat qorǵanýǵa shaqyrdy.
Maıorkınıs maquldanǵan masadan qorǵaıtyn quraldardy paıdalanýǵa, terezelerge moskıt torlaryn ornatýǵa, masaǵa qarsy torly jabyndardy qoldanýǵa jáne múmkindiginshe deneni jaýyp turatyn kıim kııýge keńes berdi.
Sondaı-aq professor úılerde, baqtarda, balkondarda, terrasalarda jáne jer ýchaskelerinde sýdyń jınalyp qalýyna jol bermeýge shaqyrdy. Sebebi mundaı oryndar masalardyń kóbeıý oshaǵyna aınalýy múmkin.
Osydan buryn Grekııa aptap ystyqqa baılanysty daladaǵy jumystarǵa ýaqytsha tyıym salynǵany belgili boldy.
