Grekııada kásipodaqtardyń ereýili saldarynan áýe qatynasy bir táýlikke toqtatyldy
ASTANA. Mamyrdyń 5-i. QazAqparat - Grekııada búgin memlekettik jáne jekemenshik sektor kásipodaqtarynyń jalpyulttyq ereýili saldarynan áýe qatynasy bir táýlikke toqtatylyp otyr.
Bul ereýilge grek áýe dıspetcherleri de qatysýda, sondyqtan da búgin eldegi barlyq jergilikti jáne sheteldik áýe reısteri toqtatyldy nemese kelesi kúnge aýystyryldy, dep habarlaıdy ITAR-TASS agenttigi.
Qoǵamdyq kólik quraldary da jumystaryn birneshe saǵatqa toqtatyp otyr, al temirjoldar bir táýlik boıy jumys istemeıdi, teńiz kemeleri de zákirlerin tastaıdy. Búgingi ereýilge jergilikti ózin-ózi basqarý organdary men bankterdiń qyzmetkerleri de, muǵalimder, arheologtar, dárigerler men jýrnalıster de qatysýda.
Afıny aqparattyq agenttigi de sársenbi kúni jergilikti ýaqyt boıynsha saǵat 06.00-dan beısenbi kúngi saǵat 6-00-ǵa deıin barlyq habarlardy toqtatatynyn málim etti.
Al Grekııa parlamenti qyzmetkerleriniń qaýymdastyǵy da «úkimettiń qatań únemdeý jónindegi sharalaryna narazylyq bildirýshi Memlekettik qyzmetkerler kásipodaqtarynyń joǵary keńesiniń ereýiline qosylyp», saǵat 4.00 pen 11.00-diń aralyǵynda - 7 saǵatqa jumystaryn toqtatatyndaryn málim etti.
