Grekııada ejelgi qala tabyldy
ASTANA. QazAqparat - Grekııanyń ortalyq bóliginen arheologtar shamamen 2,5 myń jyl burynǵy ejelgi qalany taýyp aldy. Bul Afınanyń soltústiginde Kardıtsa mańynda ornalasqan.
Qalany tapqan arheologtar Geterborg ýnıversıtetinde (Shvetsııa) jumys isteıdi. «Endi biz ejelgi zamandarda aýyldar men eldi mekender emes, naǵyz qalalardyń bolǵanyn dáleldeı alamyz», - deıdi antıkalyq mádenıetti zertteýmen aınalysatyn ǵalym Robın Renlýnd.
Tabylǵan qabyrǵalar men irgetas qaldyqtary jer ústinde jatyr. Jáne arnaıy radar arqyly jer astyndaǵy ejelgi nysandardy da anyqtaldy.
«Biz áli qazba jumystarymen aınalysqan joqpyz, degenmen jer astyndaǵy nysan týraly barlyq málimet bar. Máselen, qala joldarynyń tutas jelisi bar ekenin bilemiz», - dedi Robın Renlýnd.
Shved ǵalymdary kelesi jyly grekııalyq áriptesterimen birlesip, ejelgi qala tabylǵan aýmaqty tolyq zertteýdi josparlap otyr.
