Grekııada bir otar qoı 100 keli marıhýana jep qoıdy
Bıyl jazda Grekııada bolǵan aptap ystyq, orman órtteri men sý tasqyny óńirlerdegi aýylsharýashylyq alqaptaryn joıdy, dep habarlaıdy QazAqparat agenttigi Sky News basylymyna silteme jasap.
Grekııanyń ortalyq bóligindegi sý basqan jazyqtarda jaıylyp júrgen bir otar qoı shóp izdep júrip, Almıros qalasyna jaqyn mańdaǵy medıtsınalyq maqsatta marıhýana ósiretin jylyjaıǵa kirip ketken. Qoılar ónimniń kóp bóligin, shamamen 100 keli marıhýana jep qoıǵan.
Malshynyń sózinshe, ol qoılardyń birtúrli áreketin baıqaǵan, biraq sebebin túsine almapty.
Jylyjaı ıesi ónim onsyz da ystyq pen Denıel daýylynan zardap shekkenin, al qoılar sodan qalǵandy jep ketkenin aıtty.
Ol mundaı jaǵdaıda ne isteý keregin, kúlerimdi ne jylarymdy bilmeımin, deıdi.
Resmı tulǵalardyń sózinshe, Denıel daýylynan bolǵan sý tasqyny saldarynan 100 myńnan astam janýar men mal mert bolǵan.
Tasqynnan qashqan jurt úıdiń shatyryna shyǵýǵa májbúr boldy. 17 adam qaza tapqan nóser jaýyn 1930 jyldan beri tirkelgen eń kúshtisi eken.
Joıqyn orman órtteri jańbyrǵa ulasqany aıtylǵan bolatyn.
Aýylsharýashylyq ónimderi de aıtarlyqtaı zardap shekti.
Grekııa premer-mınıstri Kırıakos Mıtsotakıs klımat ózgerisi elge aıtarlyqtaı qıyndyq týdyrǵanyn málimdedi.
Úkimet tabıǵat apatynan zardap shekkenderge kómek kórsetý boıynsha qosymsha sharalar qabyldaý múmkindigin qarastyryp jatyr.
