Grekııada bıletsiz júrgen jolaýshylar 100 eýroǵa deıin aıyppul tóleıdi
ASTANA. KAZINFORM — Grekııanyń Afına jáne Salonıkı qalalarynda qoǵamdyq kólikte bıletsiz júrgen jolaýshylarǵa salynatyn aıyppul 100 eýroǵa deıin ulǵaıtyldy, dep habarlaıdy euronews.
2026 jylǵy 30 mamyrdan bastap kúshine engen jańa zańǵa sáıkes, jaramdy bıleti joq jolaýshylar endi 100 eýro kóleminde aıyppul tóleıdi. Buǵan deıin bul kórsetkish 72 eýrony quraǵan.
Al jeńildetilgen tarıfpen júrýge quqyǵy bar jolaýshylar úshin aıyppul mólsheri 30 eýrodan 50 eýroǵa deıin kóterildi.
Bılik bul sharany qoǵamdyq kóliktegi bıletsiz júrý derekterin azaıtý maqsatynda engizip otyr.
Sonymen qatar, aıyppuldyń jartysyn ǵana tóleý múmkindigi qarastyrylǵan. Ol úshin jolaýshy 10 kún ishinde keminde 30 kúnge arnalǵan shekteýsiz jol júrý kartasyn rásimdeýi qajet. Mundaı jaǵdaıda aıyppul 50 eýro shamasynda bolady.
Sońǵy ýaqytta baqylaýshylar qoǵamdyq kóliktegi tekseristerdi kúsheıtken. Ásirese jolaýshylar kóp júretin baǵyttar men týrıster jıi paıdalanatyn marshrýttarǵa erekshe nazar aýdarylyp otyr.
Afınada qoǵamdyq kólikke arnalǵan biryńǵaı bılet quny – 1,20 eýro (jeńildikpen – 0,50 eýro). Ol 90 mınýt boıy jaramdy jáne osy ýaqyt ishinde sheksiz aýysyp minýge múmkindik beredi.
Al Salonıkıde metro men qalalyq avtobýstarǵa arnalǵan negizgi bılet baǵasy 0,60 eýro, jeńildetilgen tarıf boıynsha – 0,30 eýro.
Osyǵan deıin Grekııada 15 jasqa tolmaǵan balalardyń áleýmettik jelige kirýine tyıym salynatyny týraly jazǵan bolatynbyz.
