Grekııa aptap ystyqqa baılanysty daladaǵy jumystarǵa ýaqytsha tyıym saldy
ASTANA. KAZINFORM – Grekııada aýa temperatýrasynyń kúrt kóterilýine baılanysty búgin saǵat 13:00-den 17:00-ge deıin ashyq aspan astynda jumys isteýge tyıym salyndy, dep habarlaıdy Anadoly.
Grekııanyń Eńbek jáne áleýmettik qamsyzdandyrý mınıstrligi kúndiz aýa temperatýrasy aıtarlyqtaı kóteriletinin málimdedi.
Osyǵan baılanysty qyzmetkerlerdiń qaýipsizdigin qamtamasyz etý maqsatynda Ortalyq Grekııada, Fessalııada, Peloponnes túbeginde jáne Afına ornalasqan Attıka óńirinde saǵat 13:00-den 17:00-ge deıin qurylys, keme jasaý zaýyttaryndaǵy jumys, kýrerlik jetkizý qyzmeti jáne ashyq aýada atqarylatyn ózge de jumystar ýaqytsha toqtatyldy.
Densaýlyǵynda kináraty bar keńse qyzmetkerlerine, sondaı-aq qarttarǵa, júkti áıelderge jáne qaýip tobyna kiretin basqa da azamattarǵa qashyqtan jumys isteý tapsyryldy.
Grekııanyń Ulttyq meteorologııa qyzmetiniń boljamynsha, 19 shildeden beri jalǵasyp jatqan aptap ystyq búgin shegine jetedi. Attıka, Beotııa, Ftıotıda, Argolıda, Fessalııa jáne Korınfııa óńirlerinde aýa temperatýrasy 40 gradýstan asady.
Fessalııada synap baǵany 43 gradýsqa deıin kóterilýi múmkin.
Sonymen qatar Krıt aralynda, Peloponnes túbeginde, Egeı teńiziniń ońtústigindegi araldarda jáne birqatar óńirde aptap ystyqpen qatar shólderden kóterilgen shańnyń taralýy kútiledi.
Osyǵan deıin jazǵanymyzdaı, Japonııada aýa temperatýrasy 40°C-den asty.
