Grekııada ánshi Mazonakıs qaıtys bolǵan klınıkaǵa qatysty tergeý bastaldy
ASTANA. KAZINFORM — Grekııada tanymal ánshilerdiń biri, 54 jastaǵy Iorgos Mazonakıstiń Afınadaǵy jekemenshik medıtsınalyq ortalyqta júregi toqtap, qaıtys bolýyna baılanysty tergeý bastaldy. Ol medıtsınalyq ortalyqqa plazmaferez protsedýrasynan ótý úshin barǵan, dep habarlaıdy Anadolu.
Tergeýshiler protsedýranyń talapqa saı júrgizilgen-júrgizilmegenin jáne medıtsınalyq ortalyqtyń plazmaferez jasaýǵa ruqsaty bar-joǵyn anyqtap jatyr.
Grek buqaralyq aqparat quraldarynyń habarlaýynsha, oqıǵaǵa baılanysty eki dáriger ustalǵan. Quqyq qorǵaý organdary plazmaferez apparatynyń qosýly kúıinde keminde 45 mınýt jumys istegenin anyqtaǵan.
Ustalǵan medıtsına qyzmetkerleri protsedýranyń «tipti bastalyp úlgermegenin», al Iorgos Mazonakıstiń ekinshi kóktamyrishilik kateterdi ornatý kezinde ózin jaısyz sezingenin aıtqan. Alaıda apparattyń 45 mınýt jumys isteýi qan tazartý protsedýrasynyń bastalyp ketkenin kórsetýi múmkin.
Medıtsınalyq ortalyqtan jedel shaqyrtý túskennen keıin oqıǵa ornyna kelgen jedel járdem qyzmetkerleri ánshiniń tamyry soqpaı turǵanyn anyqtaǵan. Dárigerler qansha kúsh salǵanymen ánshini «Elpıs» aýrýhanasynda aman alyp qalý múmkin bolmaǵan.
Grekııanyń Densaýlyq saqtaý mınıstri Adonıs Georgıadıs atalǵan medıtsınalyq ortalyqtyń tek terapııalyq kabınet retinde tirkelgenin jáne onda plazmaferez protsedýrasyn júrgizýge ruqsat bolmaǵanyn málimdedi.
Afına medıtsınalyq qaýymdastyǵynyń tóraǵasy Iorgos Patýlıs te ortalyqtyń plazmaferez apparatyn paıdalanýǵa quqyǵy bolmaǵanyn aıtty.
Eske sala keteıik, bıyl mamyr aıynda Aqtaý qalasynda eks-depýtat jeke klınıkada ota kezinde komaǵa túsip, kóz jumdy.
Sondaı-aq zań buzýshylyqtardan keıin plastıkalyq hırýrgııa klınıkalary jappaı tekseriletini habarlandy.
