Grekııada álemniń jeti keremetiniń birin qaıtadan qalpyna keltirmek
ASTANA. QazAqparat - Grek sáýletshileri komandasy budan 2000 jyl buryn buzylǵan Rodostaǵy Koloss ejelgi músinin qalpyna keltirý jobasyn usyndy.
Jobanyń bas sáýletshisi Arıs Pallastyń aıtýynsha, jańa Koloss grek ekonomıkasynyń qalpyna keltirilýin beıneleýi tıis.
«Biz Grekııa qaıtadan aıaǵyna tura alatynyn kórsetkimiz keledi, ekonomıkany qaıta qalpyna keltirýge eldiń kúshi jetedi», - dedi Pallas.
Sáýletshilerdiń paıymdaýynsha, jańa músin túpnusqasyndaǵydan bes ese úlken bolyp, bıiktigi 135 metrge jetpek. Monýment burynǵy ornyna, Rodos porttyq qalasynyń qoınaýyna kirer jerge ornatylady, qalaǵa kiretin kemeler ejelgi dáýirdegi sııaqty alyp músinniń aıaqtarynyń arasynan ótedi, dep habarlady moya-planeta.ru .
«Biz ejelgi Kolosstyń kóshirmesin qaıtalamaımyz. Biz ony jetildirip, sımvoldyq beınege aınaldyramyz. Biz búkil álemnen adamı jáne qarjylyq resýrstardy iske qosamyz. Sóıtip, ol jahandaný sımvoly bolady jáne sonymen qatar ejelgi Kolosspen baılanysty grek mádenı dástúrlerin jańǵyrtamyz», deıdi Pallas.
Músin qola tústes kún batareıalarymen jabdyqtalady. Koloss ishinde ejelgi murajaı jáne kitaphana bolmaq. Ony jasaýshylardyń esebinshe, músindi turǵyzý 250 mln. eýroǵa túspek. Bul qarjy shamamen jeti jylda ózin aqtaıdy: joba avtorlarynyń esebinshe, Koloss týrısterdi tartý esebinen jylyna 35 mln. eýroǵa tarta tabys ákelmek.
Ázirge jobany qarjylandyrý kózderi anyqtalǵan joq. Sáýletshiler ony júzege asyrý úshin jeke demeýshilerdi jáne memlekettik bıýdjetten qarjy tartpaqshy.
Rodostaǵy Koloss - ejelgi grektiń Kún qudaıy - Gelıostyń alyp músini, ol Grekııada, Egeı teńizindegi osymen attas araldaǵy Rodos porttyq qalasynda bolǵan. Ol álemniń jeti keremetiniń biri. Onyń bıiktigi shamamen 36 metr boldy. Koloss 65 jyl turdy. Bizdiń jyl sanaýymyzǵa deıingi 222-shi nemese 226-shy jyly Rodostaǵy jer silkinisi saldarynan qırady.
