Grekııada AQSh-tyń burynǵy elshisine qatysty tergeý júrip jatyr
ASTANA. KAZINFORM — AQSh Federaldyq tergeý bıýrosynyń (FTB) qyzmetkerleri Grekııaǵa baryp, AQSh-tyń osy eldegi burynǵy elshisi Kımberlı Gılfoılǵa qatysty aıyptaýlardy tekserip jatyr. FTB ókilderi ótken aptadan beri Afınada júr, dep habarlaıdy Report.
Tergeý barysynda burynǵy elshiniń jaqyn ortasynda bolǵan lobbıst Hrıstos Marafatsostyń róli, sondaı-aq onyń baılanystary men Grekııanyń Aktor qurylys-energetıkalyq tobymen jasaǵan boljamdy kelisimderi tekserilip jatyr. FTB qyzmetkerleriniń Grekııadaǵy tergeý jumystarynyń qashan aıaqtalatyny ázirge belgisiz.
Gılfoıldyń esimi AQSh prezıdenti Donald Tramp ákimshiliginiń qyzmetine qatysty Kongrestegi aldaǵy tergeý aıasynda da atalyp otyr. Bul tekserýdi Kongrestegi demokrattar júrgizýdi josparlaǵan.
Kongressmen Robert Garsııa burynǵy elshige hat joldap, onyń qyzmettik ókilettigin qarjylyq nemese ózge de paıda tabý maqsatynda paıdalanýy múmkin degen kúdikke qatysty barlyq qujatty saqtaýdy talap etken.
Hatta Gılfoıl Senat onyń kandıdatýrasyn maquldaǵanǵa deıin Respýblıkalyq partııanyń donorlarynyń birinen 100 myń dollar suraǵany týraly málimet keltirilgen. Boljam boıynsha ol bul qarajattyń ornyna donorǵa Tramp ákimshiligindegi joǵary laýazymdy tulǵalarmen baılanys ornatýǵa múmkindik berýge ýáde etken. Keıin bul somany 1 mıllıon dollarǵa deıin jetkizý múmkindigi de qarastyrylǵan.
Sonymen qatar demokrattar Gılfoıldyń Grekııanyń eki kásipkeri qarjylandyrǵan saparlaryna qatysty aqparatty teksermek. Burynǵy elshiniń bul kásipkerlermen tyǵyz baılanysta bolǵany aıtylady.
Kongressmenderdiń tergeýine burynǵy elshiniń Aktor tobynyń múddesin qorǵaǵan lobbıstpen baılanysy týraly málimetter de negiz bolýy múmkin. Hatta keltirilgen aqparatqa sáıkes, Gılfoıl Balqan elderiniń úkimetterine ınfraqurylymdyq jobalardy osy kompanııaǵa berý maqsatynda birneshe ret qysym kórsetken bolýy múmkin.
Buǵan deıin AQSh Ulttyq qaýipsizdik agenttiginiń qupııa jelisi isten shyqqan bolatyn.