Grekııada 68 gradýstyq aptap ystyq: bılik turǵyndardy saq bolýǵa shaqyrdy

ASTANA. KAZINFORM — Grekııany qamtyǵan ystyq tolqyny áli de basylar emes. Eldiń kóptegen óńirinde aýa temperatýrasy +40℃ deńgeıinde saqtalyp tur. Bılik turǵyndardy kún ótý qaýpi jóninde eskertip, saq bolýǵa shaqyrdy, dep jazdy Euronews.

Грекияда 68 градустық аптап: билік тұрғындарды сақ болуға шақырды
Фото: Pixabay.com

Grekııada bul jaı ǵana ystyq emes — naǵyz aptap. Kóptegen aımaqta termometr kórsetkishi 40 gradýstan asyp ketken. Ásirese iri qalalarda turatyn halyq úshin jaǵdaı óte aýyr.

Apta basynda Afıny mýnıtsıpalıtetinde jylý beıneleý qurylǵysymen jabdyqtalǵan dron jol ústinde +68℃ temperatýrany tirkegen. Bılik kún ótý qaýpin eske sala otyryp, turǵyndarǵa sýsyz qalmaýǵa, deneni qyzyp ketýden saqtaýǵa jáne úı ishindegi salqyndyqty saqtaý úshin barlyq qajetti sharalardy qabyldaýǵa keńes berip otyr.

— Kúnnen qorǵaıtyn krem, bas kıim, jeldetkish, salqyn sý — mine, bul aptaptan qutylýdyń negizgi quraldary, — deıdi jergilikti turǵyn. Basqa áıel oǵan qosylyp: «Sýǵa tússeń, ózińdi áldeqaıda jaqsy sezinesiń, — deıdi.

Aptap, ásirese, densaýlyǵynda aqaýy bar adamdar men ashyq aýada jumys isteıtinder úshin qaýipti. Olar úshin Eńbek mınıstrligi arnaıy nusqaýlyq taratty. «Biz kúni boıy kúnniń astynda júremiz. Sý bótelkesi, jemis-jıdek, bet jýý — qolymyzdan keletini osy. Basqasha jaǵdaıda jumys isteý múmkin emes, — deıdi jumysshy.

Grekııada tótenshe aptap tirkeldi. Bılik kúnniń qatty ótý qaýpi jóninde eskertip otyr.

Qyzyl órt qaýpi dabyly

Sala mamandarynyń deregi boıynsha, Grekııanyń 11 óńirinde órt qaýpi óte joǵary. Orman sharýashylyǵy departamenti orman órti men ottyń taralý qaýpine baılanysty «qyzyl dabyl» jarııalady.

Órt sóndirý qyzmeti joǵary daıyndyq rejımine kóshti. Turǵyndarǵa shóp, butaq jáne qoqys jaǵýǵa, ushqyn shyǵaratyn qurylǵylarmen (mysaly, dóńgelek ara nemese dánekerleý apparattary) jumys isteýge qatań tyıym salynǵan. Sondaı-aq dalada mangal nemese grıl jaǵýǵa bolmaıdy.

Órt sóndirýshiler, áskerı kúshter men polıtsııa qaýipti aımaqtarda áýeden patrýl júrgizip jatyr. Halyqtan órt nemese tútin baıqalǵan jaǵdaıda shuǵyl qyzmetterge dereý habarlaýdy ótindi.

Ulttyq meteorologııalyq qyzmettiń boljamy boıynsha, aptap jeksenbi kúni Grekııanyń soltústik-batysynda báseńdeı bastaıdy. Al dúısenbi kúni eldiń kóp bóliginde temperatýra birtindep tómendeıdi dep kútiledi. 

Eske sala keteıik, buǵan deıin Ispanııada aptap ystyq sońǵy eki aıda 1180 adamnyń ómirin jalmaǵanyn jazǵan edik.

Сейчас читают