Grekııada 50 adam órtenip ketti
ASTANA. QazAqparat - Grekııada alapat orman órtinen qaza tapqandar sany 50-ge jetti, dep habarlaıdy «QazAqparat» HAA GreekReporter-ge silteme jasap.
Qyzyl Krest qutqarýshylary seısenbi kúni tańerteń Shyǵys Attıkanyń Matı eldi mekenindegi Argırı Aktı jaǵajaıynyń mańynan tirideı órtengen 26 adamnyń denesin tapty. Jergilikti bılik organdary da bul aqparatty rastaǵan. Qurbandar - sol mańdaǵy úılerdiń turǵyndary bolýy múmkin, boljamdarǵa qaraǵanda, olar tilsiz jaýdan qashyp, teńizde jan saqtamaq bolǵan, biraq jete almaı janyp ketken.
Qazir 156 adam aýrýhanada jatyr, sonyń 11-i jansaqtaý bóliminde.
Kúshti jel basyldy. Shyǵys Attıkanyń Matı, Rafına, Kalamos jáne Výtzas eldi mekenderindegi órt sóndirilgen. Degenmen, órt sóndirýshiler áli de qaýiptiń joıylmaǵanyn aıtady.
Grekııa prezıdenti Prokopıs Pavlopýlos elde aza tutý kúnin jarııalap, búgin atap ótilýi tıis demokratııanyń tiktelý kúnine (1974 jylǵy 24 shilde) arnalǵan sharalar keıingi qaldyrdy.
Foto: © AFP 2018 Valerie Gache
