Grekııada 2026 jylǵy jazǵy jasóspirimder Olımpıadasynyń alaýyn jaǵý rásimi ótti
ASTANA. KAZINFORM - Grekııanyń Afına qalasynda 2026 jylǵy jazǵy jasóspirimder Olımpıadasynyń alaýyn jaǵý rásimi ótti. Jarys bıyl Senegaldyń Dakar qalasynda ótedi, dep habarlaıdy Ulttyq olımpıada komıteti.
Saltanatty shara tarıhı «Panatınaıkos» stadıonynda uıymdastyryldy. Olımpıada dástúrine saı alaý kún sáýlesiniń kómegimen jaǵylyp, keıin Dakar oıyndaryn uıymdastyrý komıtetiniń ókilderine tabystaldy.
Halyqaralyq Olımpıadalyq komıtetiniń prezıdenti Kırstı Koventrı aldaǵy jasóspirimder Olımpıadasynyń tarıhı mańyzyna toqtaldy.
-Jaqyn arada Senegalda álemniń túkpir-túkpirinen jas sportshylar bas qosady. Bul - Afrıka qurlyǵynda ótetin alǵashqy Olımpıada. Senegal men búkil Afrıka úshin bul - maqtan tutarlyq sát. Sondaı-aq Olımpıada qozǵalysynyń tarıhynda jańa ári mańyzdy kezeń bastalady, - dedi Kırstı Koventrı.
Rásimnen keıin alaý Senegalǵa jol tartty. Onyń Dakarǵa jetkizilýi 12 qyrkúıekke josparlanǵan. Ushý kezinde alaý arnaıy shamnyń ishinde Olımpıada alaýyn kúzetýshilerdiń baqylaýynda saqtalady.
14 qyrkúıek pen 30 qazan aralyǵynda Senegal aýmaǵynda «Pass the Energy» («Qýatyńmen bólis») uranymen alaý estafetasy ótedi. Estafeta baǵyty eldiń barlyq 14 óńirin qamtyp, 30-dan astam kezeńnen turady. Oǵan jas sportshylar, mektep oqýshylary, mádenıet ókilderi men jergilikti qaýymdastyq múshelerin qosa alǵanda, júzdegen adam qatysady.
-Estafeta aıaqtalǵannan keıin alaý Dakarǵa qaıta jetkiziledi. 31 qazanda Dıamnıadıodaǵy Abdýlaı Vad atyndaǵy stadıonda ótetin ashylý saltanaty kezinde jasóspirimder Olımpıadasynyń qazany jaǵylady. Keıin alaý Corniche West jaǵalaýyna jetkizilip, jarys aıaqtalǵanǵa deıin sonda saqtalady,-delingen habarlamada.
Eske sala keteıik, Dakar-2026 jasóspirimder Olımpıadasy 31 qazan men 13 qarasha aralyǵynda ótedi. Jarystar Dakar, Dıamnıadıo jáne Salı qalalaryndaǵy úsh klasterde uıymdastyrylady. Oıyndarǵa álemniń ár elinen shamamen 2700 jas sportshy qatysyp, 25 sport túrinen baq synaıdy.
Aıta keteıik, Dakar-2026 - jazǵy jasóspirimder Olımpıadasynyń tórtinshisi. Sonymen qatar bul - Afrıka qurlyǵynda ótetin tarıhtaǵy alǵashqy Olımpıada oıyndary.
Osyǵan deıin 2027 jyly elordada jeti álem chempıonaty ótetini týraly jazdyq.
