Grekııada 2025 jyl el tarıhyndaǵy ekinshi eń ystyq jyl boldy
ASTANA. KAZINFORM — Grekııada 2025 jylǵy ortasha aýa temperatýrasy el tarıhynda tirkelgen eń joǵary ortasha jyldyq temperatýralar arasynda ekinshi orynǵa shyqty. Bul týraly Anadolý jazdy.
Klımatologtardan quralǵan «Climatebook» toby Grekııadaǵy 2025 jylǵy aýa temperatýrasyna jan-jaqty baǵalaý júrgizilgen.
Esepte kórsetilgendeı, búgingi kúnge deıin Grekııa aýmaǵynda júrgizilgen barlyq ólsheýlerdiń nátıjesi boıynsha, jyldyq ortasha temperatýrasy 15,3 gradýs bolǵan 2025 jyl, 1890 jyldan beri júrgizilip kele jatqan baqylaýlar tarıhynda, 2024 jyldan keıingi ekinshi eń ystyq jyl bolyp tanyldy. Aıta ketý kerek, 2024 jyly ortasha jyldyq temperatýra eń joǵary kórsetkishke jetken.
Ótken jylǵy ortasha temperatýra 2024 jylmen salystyrǵanda 0,7 gradýsqa tómen, al 2023 jylmen salystyrǵanda 0,1 gradýsqa joǵary boldy.
Jyl boıy 262 kúnde aýa temperatýrasy 1991–2020 jyldar aralyǵyndaǵy ortasha kórsetkishten joǵary bolǵan. Sonymen qatar byltyrǵy naýryz aıynda eldiń kóptegen óńirinde temperatýra rekordtyq deńgeıge jetken.
Ótken jyldyń jazy Grekııa tarıhyndaǵy úshinshi eń ystyq jaz retinde tirkeldi.
Jalpy alǵanda, Grekııadaǵy eń ystyq jeti jyldyń altaýy sońǵy jeti jylǵa tıesili. Al el tarıhyndaǵy eń ystyq úsh jyl sońǵy úsh jylda qatarynan tirkelgen.
Aıta ketsek, Shanhaıda aptap ystyq uzaqtyǵy boıynsha júz jyldyq rekord jańardy.