Grekııada 15 jasqa tolmaǵan balalardyń áleýmettik jelige kirýine tyıym salynady
ASTANA. KAZINFORM – Tyıym 2027 jyldyń 1 qańtarynan bastap kúshine enedi, dep habarlaıdy The Guardian basylymy.
Eldiń premer-mınıstri Kırıakos Mıtsotakıs buǵan el arasyndaǵy mazasyzdyqtyń artýy, uıqy problemalary jáne onlaın platformalardyń táýeldilikke ıtermeleıtini sebep bolǵanyn aıtady. Alaıda bul keıbir balalarǵa unamaýy múmkin ekenin de moıyndady.
-Biz qıyn, biraq qajetti qadam jasaýdy sheshtik: 15 jasqa tolmaǵan balalarǵa áleýmettik jelilerge kirýge tyıym salý. Bizdiń maqsatymyz - bilim men shyǵarmashylyq kózi bola alatyn tehnologııaǵa qol jetkizýden aıyrý emes... Kóptegen jastar maǵan salystyrýlardan, pikirlerden jáne únemi onlaın bolýǵa qysym jasaýdan sharshaǵanyn aıtady, - dedi ol.
Mıtsotakıs kıberbýllıng jáne balalardyń qoldanbalarǵa táýeldiliginiń artýy týraly kóptegen shaǵymdardan keıin ata-analarmen keńeskenin aıtty.
Mıtsotakıstiń ortalyq-ońshyl «Jańa demokratııa» partııasy basqaratyn 300 oryndyq parlament osy jazda tyıym salý boıynsha daýys beredi, bul Gretsııany Eýropada mundaı zańnama qabyldaǵan alǵashqy elderdiń biri etedi.
2027 jyldyń 1 qańtarynan bastap platformalar kámeletke tolmaǵan paıdalanýshylardyń kirýin shekteýi kerek, áıtpese EO-nyń Sandyq qyzmetter týraly zańyna (DSA) sáıkes aıyppul salynady, bul álemdik aınalymnyń 6%-yna jetýi múmkin.
Ótken jyly úkimet mektepterde uıaly telefondarǵa tyıym salyp, balalardy ekran aldynda shamadan tys ýaqyt ótkizýden qorǵaý úshin ata-ana baqylaýy platformalaryn qurdy.
Qańtar aıynda Frantsııa da osyndaı zań qabyldaýdy qolǵa aldy.
Aýstralııa 2025 jyldyń jeltoqsanynda 16 jasqa tolmaǵandar úshin 4,7 mıllıonnan astam áleýmettik jeli akkaýnttaryn buǵattaıtynyn jarııalady. Ispanııa, Malaızııa, Danııa jáne Polsha da tyıym salýdy qarastyryp jatyr. Jýyrda Túrkııa áleýmettik jelilerge qatysty talapty kúsheıtkenin jarııalady.
