Grekııa, Túrkııa men Bolgarııadaǵy sý tasqyny: qurbandar bar
AFINA. QazAqparat – Keshe Grekııa, Túrkııa men Bolgarııada nóser jańbyr jaýyp, saldarynan sý tasyp, jeti adam qaza tapty, dep habarlaıdy QazAqparat AR basylymyna silteme jasap.
Túrkııanyń Іshki ister mınıstri Alı Erlıkaıa Bolgarııamen shekaraǵa jaqyn mańdaǵy Kyrklarelı provıntsııasynda eki adam mert bolyp, tórt turǵyn iz-túzsiz joǵalyp ketkenin habarlady.
Іz-túzsiz joǵalyp ketkenderdi izdeý-qutqarý jumystary úzdiksiz jalǵasyp jatyr.
Túrkııanyń iri qalasy Ystambuldyń eki kvatalynda kósheler men úılerdi nóser jańbyr sýy basyp qaldy. Saldarynan eki adam qaza tapty. Onnan astam turǵyn qutqaryldy.
Aýa raıynyń qolaısyzdyǵyna baılanysty keıbir metro beketteri jabylǵan.
Grekııada Volos qalasy, taýǵa jaqyn mańdaǵy Pılıon aýdanynda jáne Skıatos kýrortty aımaǵynda joldaǵy qozǵalys toqtatyldy. Polıtsııa habarlaýynsha, rekordtyq jaýynnan bir adam qaza tapqan. Las sý tasqyny jolyndaǵynyń bárin jaıpap ótken.
Bes adam iz-túzsiz joǵalǵan, olardy tasqyn sý aǵyzyp áketýi múmkin. Bılik ókilderi azamattardy asa qajet bolmaǵan jaǵdaıda úıden shyqpaýǵa shaqyrdy.
Pılıon taý silemi aýdanynda arnasynan asqan sý teńiz turaǵyna qoıylǵan kólikterdi aǵyzyp áketken.
Kóptegen aýdanda elektr sóndi. Bılik ókilderi qaýipsizdik maqsatynda Volos qalasyndaǵy qarttar úıiniń turǵyndaryn evakýatsııalady.
Grekııanyń meteorologııa qyzmeti seısenbi kúni keshke Pılıon taýly aýdanyndaǵy aýylǵa 75,4 sm (30 dıýımǵa jýyq) jańbyr jaýǵanyn aıtty. Bul – 2006 jyldan beri túsken jaýyn-shashynnyń eń kóp mólsheri. Habarlamada Afına aýdanynda jaýyn-shashynnyń ortasha jyldyq mólsheri 40 santımetr (15,75 dıýım) ekeni aıtylǵan.
Boljam boıynsha, nóser jaýyn sársenbi tústen keıin basylady. Zardap shekken aýdandardyń turǵyndaryna úıinen shyqpaýǵa keńes berildi.
Buǵan deıin Grekııada alapat orman órti týdyrǵan aptap ystyq nóser jaýynǵa ulasqany habarlanǵan bolatyn. Keıingi birneshe aptada órtten 20-dan astam adam qaza tapty.
Bolgarııa premer-mınıstri Nıkolaı Denkovtyń sózinshe, eldiń soltústiginde bolǵan tasqyn saldarynan eki adam qaıtys bolyp, úsh turǵyn iz-túzsiz joǵalyp ketken.
Arnasynan asqan sý jol men kópirlerge aıtarlyqtaı zalal keltirdi. Osy aýdanda elektr energııasy sóngen.
Bılik ókilderi aǵyn sý krandy lastaǵanyn aıtyp, ol jerden sý alyp ishpeýge shaqyrdy.
Bolgarııanyń ońtústiginde eń qatty zardap shekken Tsarevo kýrorttyq qalasynda tótenshe jaǵdaı jarııalandy.
