Grekııa restavratorlary Parfenonnyń burynǵy kelbetin tolyq qalpyna keltirdi
ASTANA. KAZINFORM – Shamamen eki ǵasyrdan keıin alǵash ret Akropolge kelýshiler Parfenon ǵıbadathanasynyń batys qasbetin barynsha tolyq kúıinde tamashalaı alatyn boldy. Grekııanyń Mádenıet mınıstrligi Parfenonnyń batys frontonyn qalpyna keltirý jumystarynyń aıaqtalǵanyn jarııalap, eskertkishtiń batys jaǵyndaǵy qurylys ormandaryn tolyq alyp tastaǵanyn málimdedi. Bul týraly mınıstrliktiń saıtynda jarııalandy.
Jumys barysynda restavratorlar batys frontondaǵy bos turǵan oryndarǵa eki tik tireý ornatyp, antıtemalyq qabyrǵany qalpyna keltirýdi aıaqtady. Osylaısha frontonnyń sáýlettik tutastyǵy qaıta jańǵyrtyldy.
Mádenıet mınıstri Lına Mendonı ashylǵan kórinisti «shynymen tańǵalarlyq» dep atap, atqarylǵan jumystyń tarıhı mańyzyn erekshe atap ótti.
– Grekııa azamattary men álemniń túkpir-túkpirinen kelgen qonaqtar aıaqtalmaǵan kúıde kórýge úırengen fronton óziniń sáýlettik tutastyǵyn qaıta tapty. Eki jańa tik tireý morfologııalyq olqylyqtyń ornyn toltyryp qana qoımaı, Parfenonnyń batys bóliginiń biregeı proportsııalary men geometrııalyq kemeldigin qaıta aıqyndaýǵa múmkindik beredi, – dedi ol.
Mınıstrdiń aıtýynsha, bul restavratsııa sońǵy jyldardaǵy tehnıkalyq turǵydan eń kúrdeli jobalardyń biri boldy.
Qalpyna keltirý jumystary standarttan tys ınjenerlik sheshimderdi qajet etti. Batys frontondaǵy úlken baǵan bastapqy geometrııasyna deıin qalpyna keltirilip, saqtalǵan kóne bólshekter jańa mármármen biriktirildi. Al ekinshi baǵan tolyqtaı jańa mármárdan qaıta jasaldy. Tastardy sońǵy ret ornatý úshin zamanaýı qaýipsizdik talaptaryna saı jáne eskertkishtiń kelbetine úılesimdi arnaıy qurylys qurylymy paıdalanyldy.
– Búgin biz Parfenonnyń batys frontonyn sońǵy 220 jylda bolmaǵan kúıinde kórip otyrmyz. Bul – eskertkish úshin de, Akropol úshin de, kúlli álemdik órkenıet úshin de tarıhı mańyzy bar sát, – dep atap ótti Lına Mendonı.
Jumysty Akropol eskertkishterin saqtaý komıtetiniń mamandary júrgizdi. Joba Eýropalyq odaqtyń Qalpyna keltirý jáne turaqtylyq qory aıasynda qarjylandyryldy.
Aıta keteıik, byltyr Grekııada táji tóńkerilip kıgizilgen áıeldiń erekshe qabiri tabylǵanyn jazdyq.
