Grekııa premer-mınıstri tótenshe jaǵdaı engizilgen Santorınıge bardy

ASTANA.KAZINFORM - Juma kúni Grekııadaǵy seısmıkalyq belsendiliktiń sharyqtaý sheginde eldiń premer-mınıstri Kırıakos Mıtsotakıs Santorınıge bardy. Egeı araly kúshti jer silkinisine baılanysty qosymsha saqtyq sharalaryn jasady, dep jazady Euronews.

Mıtsotakıs sapar barysynda tótenshe jaǵdaılarǵa daıyndyq nysandaryn tekserip, araldyń ońtústik bóliginde evakýatsııalaý jolyn salýǵa 3 mıllıon eýro bólinetinin habarlady.

- Biz kelýi múmkin jamandyqtarǵa daıyndalyp, jaqsylyqtan úmittenemiz. Baıypty jáne uıymdasqan memleket osylaı isteýi kerek, - dedi Mıtsotakıs jergilikti bılik ókilderimen kezdesýde.

Áskerı júk kólikter Santorınıge elektr generatorlaryn jetkizdi, al qutqarýshylar apta basynda aralǵa bardy.

Mundaǵy jer silkinisi myńdaǵan jergilikti turǵyndardyń, týrıster men maýsymdyq jumysshylardyń kóshýine sebep boldy, olar Gretsııanyń materıktik bóligine paromdarmen evakýatsııalandy.

Sarapshylar seısmıkalyq belsendiliktiń Egeı teńizindegi janartaý belsendiligimen baılanysty emes ekenin aıtady, biraq olar dúmpýlerdiń odan da kúshti jer silkinisine ákelip soǵýy múmkin ekenin ázirge naqty aıta almaıdy.

Sarapshylardyń aıtýynsha, Santorınıde mundaı joǵary seısmıkalyq belsendilik ádettegi qubylys jáne birneshe aıǵa sozylýy múmkin.

Kúshti jer silkinisi qaýpine baılanysty turǵyndar men týrıster Santorınıdi tastap ketip jatqanyn jazǵan bolatynbyz.