Grekııa Parlamenti QR men EO arasyndaǵy áriptestik týraly kelisimdi ratıfıkatsııalady
ASTANA-AFINY. QazAqparat - Grekııanyń úkimettik gazetinde 22 qarashada «Qazaqstan Respýblıkasy bir jaǵynan, EO men oǵan múshe-memleketteri ekinshi jaǵynan, arasyndaǵy Keńeıtilgen áriptestik pen yntymaqtastyq týraly Kelisimin ratıfıkatsııalaý týraly» Zańy jaryq kórdi, delingen Grek Respýblıkasyndaǵy QR Elshiliginiń baspasóz baıanynda.
Aǵymdaǵy jyldyń 8 qarashasynda Grek Respýblıkasy Parlamentiniń plenarlyq májilisinde bolǵan daýys berýde atalǵan Zań biraýyzdan derlik qabyldandy.
2015 jyldyń 21 jeltoqsanynda Astanada qol qoıylǵan «Qazaqstan men Eýropalyq Odaq arasyndaǵy keńeıtilgen Kelisim» eki taraptyń qarym-qatynastaryn sapaly jańa deńgeıge kóterýge múmkindik beretin ekinshi býyndaǵy biregeı qujat bolyp tabylady.
Atalǵan qujattyń EO-ǵa múshe-memleketter tarapymen tolyq ratıfıkatsııalanýy men zańdy kúshine enýi ekijaqty yntymaqtastyqtyń barlyq baǵyttaryn barynsha keńeıtip, nyǵaıýyna jol ashady. Búgingi tańda Eýropalyq Odaq Qazaqstannyń eń iri saýda-ekonomıkalyq jáne ınvestıtsııalyq áriptesi, al ekijaqty saýda aınalymy jaǵymdy dınamıkany kórsetýde.
Sonymen qatar, Qazaqstan men EO arasyndaǵy jańa Kelisim eki memlekettiń ózara ınvestıtsııalary men iskerlik múddelerin alǵa jyljytyp-qorǵaýǵa, jáne de jalpy ekijaqty yntymaqtastyqtyń odan ári damýyna eń qolaıly múmkindikter jasaýǵa negiz bolmaq. Jańa Kelisim 29 túrli saladaǵy yntymaqtastyqty qamtıdy. Qazaqstan men Grekııa ózara múddelerine saı keletin aýqymdy máselelerdi zamanaýı quqyqtyq negizde dıalog qurý arqyly tıimdi sheshýge múmkindik aldy.
