Grekııa orman órtine baılanysty adamdardy evakýatsııalap jatyr

ASTANA.KAZINFORM — Grekııada eldiń ártúrli aımaqtarynda jalǵasyp jatqan orman órtterine baılanysty kóptegen eldi mekennen turǵyndar evakýatsııalanyp jatyr. Orman órtine qatysty kúrdeli jaǵdaı Aheıa, Sakyz (Hıos) jáne Epır óńirlerinde baıqalady. 

Órt sóndirý qyzmetiniń habarlaýynsha, seısenbi tańynan bastap el boıynsha órtti sóndirýge 4 850 adam tartylǵan, tań atqanda avıatsııa oshaqtarǵa sý shashýdy qaıta jalǵastyrdy.

Grek BAQ-ynyń málimetinshe, túnde Kefalonııa men Megarada jańa órt oshaqtary tutanǵan.

Al ótken túnde Aheıa prefektýrasynyń Patra qalasyna jaqyn ornalasqan Sıhena aýdanynda shyqqan órt turǵyn úı sektoryna jetip, birneshe úıge zaqym keltirdi jáne aımaq turǵyndaryn evakýatsııalaýǵa májbúr etti.

Sakyz (Hıos) aralynyń soltústik-batysyndaǵy aýyldar tolyqtaı evakýatsııalandy. Órt egistik alqaptaryna, ormandarǵa, fermalarǵa, qoımalar men kólikterge aıtarlyqtaı zııan keltirdi.

Jaǵalaý kúzeti qyzmetkerleri men jeke qaıyq ıeleri Lımnııa aımaǵynan shamamen 40 adamdy teńiz arqyly evakýatsııalady.

Epır aımaǵynyń Preveza óńirindegi Zıros mýnıtsıpalıtetinde shyqqan órt shamamen 30 shaqyrym aýmaqqa taralyp, kóptegen aýyl turǵyndaryn evakýatsııalaýǵa májbúr etti.

Órt sóndirý ofıtserleri qaýymdastyǵynyń tóraǵasy Kostas Tsıgas jergilikti telearnalardyń birinde sóılegen sózinde órt jaǵdaıyn «dramalyq» dep atady.

Onyń aıtýynsha, sońǵy 24 saǵat órt qaýpi joǵary maýsymdaǵy eń qıyn táýlikter bolǵan.

Tsıgas tek keshe ǵana 82 órt tirkelgenin, al qatty jel, qurǵaqshylyq jáne joǵary temperatýra órtti sóndirýdi qıyndatyp otyrǵanyn aıtty.

— Eń qaýipti órt oshaqtary Patra men Prevezada ornalasqan, ári bul eki órt te eldi mekenderge tikeleı jaqyn aımaqtarda taralýda, — dep tolyqtyrdy ol. 

Aıta ketelik Chernogorııa orman órtterine baılanysty halyqaralyq kómek suraǵan edi.