Grekııa — Qazaqstan fýtbol matchyna 18 myń bılet satylyp ketti

ASTANA. KAZINFORM — Fýtboldan Ulttar lıgasy pleı-off satysyndaǵy Qazaqstan jáne Grekııa kezdesýine qazirge deıin 18 myńnan astam bılet satylǵan. Atalǵan oıyn Grekııa astanasy Afına qalasyndaǵy 30 myńǵa tarta adam sııatyn OPAP Arena stadıonynda ótedi.

2024 jylǵy Eýropa chempıonatynyń joldamasy úshin eki qurama 21 naýryzda baq synaıdy.

Oıyn 21 naýryzdan 22-ne qaraǵan túni saǵat 00:35-te Qazaqstan jáne Qazsport telearnalarynan tikeleı efırde kórsetiledi.

FIFA reıtınginde Grekııa quramasy 49-orynda tursa, Qazaqstan 100-orynǵa jaıǵasqan. 

Eki qurama buǵan deıin úsh máte kezdesip, barlyǵynda grekııalyq fýtbolshylar jeńiske jetti.

Aldymen 2006 jylǵy álem chempıonaty irikteý týrnırinde ekinshi topta baq synaǵan el quramasy atalǵan qarsylasyna 1:3, 1:2 esebimen jol berdi.

Al 2006 jyly Kıprde ótken halyqaralyq týrnırde taǵy da 0:2 esebimen jeńilip qaldy. 

Oqý-jattyǵý jıyny aıasynda qazaqstandyq fýtbolshylar Túrikmenstanmen ótken joldastyq kezdesýde qarsylasyn 2:0 esebimen tize búktirdi.

Keıinnen oqý-jattyǵý jıynyna Baktıer Zaınýtdınov pen Abat Aıymbetov qosyldy.

Aıta ketsek, fýtboldan Qazaqstan quramasy búgin, 19 naýryzda Grekııaǵa attanady.
 
Ejelgi Ellada eliniń ókilderi qurlyqtyq dodada nebári 4 márte baq synaǵan.

Alǵash ret 1980 jyly Eýropa chempıonatyna bet túzgen olar araǵa baqandaı 24 jyl salyp dúbirli dodaǵa qaıta oraldy.

Sol jyly aıdy aspanǵa shyǵaryp, jeńis tuǵyrynan kórindi.

Odan keıingi 2008, 2012 jyldarda sol nátıjesin qaıtalaı alǵan joq. 2008 jyly toptyq kezeńde súrinse, 2012 jyly ¼ fınaldan eline qaıtty. 

Jeńgen jaǵdaıda 26 naýryzda taǵy da syrt alańda Grýzııa-Lıýksembýrg jubynyń jeńimpazymen sheberlik baıqasady.

Jeńimpaz qurama 2024 jylǵy Eýropa chempıonaty fınaldyq satysyna joldama alady.

Qazaqstandyq fýtbolshylar qurlyqtyq dodanyń irikteý satysynda H tobynda synǵa túsip, úshinshi orynǵa turaqtady.

Olar barlyǵy 18 upaı jınap, ulttyq quramanyń rekordyn jańartty.