Grekııa Eýroodaqtan qarjylyq kómektiń alǵashqy transhyn aldy
ASTANA. Mamyrdyń 13-i. QazAqparat - Grekııa Eýroodaq boıynsha seriktesteri Halyqaralyq valıýta qorymen birlesip berip otyrǵan kómektiń aıasyndaǵy 5,5 mıllıard eýro kólemindegi qarjylaı kómektiń alǵashqy transhyn aldy.
Bul týraly eldiń qarjy mınıstrliginen málim etti, dep habarlaıdy «RIA «Novostı» agenttigi.
Esterińizge sala keteıik, eýroaýmaqqa kiretin 16 eldiń qarjy mınıstrleri mamyrdyń 2-sinde Brıýsselde ótken kezekten tys basqosýda Eýroodaq pen Halyqaralyq valıýta qory taraptarynan Grekııaǵa kórsetiletin 110 mıllıard eýro kólemindegi qarjylaı kómekti bekitken bolatyn. Bul somanyń 80 mıllıard eýrosyn - Eýroodaq, onyń ishinde 22 mıllıard somany eýroaýmaqtaǵy ekonomıkasy eń úlken Germanııa óz moınyna alyp otyr. Eýro aýmaǵyndaǵy eýroodaq elderiniń nesıeleri ekijaqty mazmunǵa ıe jáne jylyna 5 paıyzdyq jeńildikpen beriletin bolady.
