Grekııa bıligi kóz jumǵan adamdarǵa zeınetaqy tólep kelgen
ASTANA. 12 tamyz. QazAqparat - Grekııa bıligi qaıtys bolǵandyqtary belgili bolǵan soń bir jarym myńǵa jýyq adamǵa zeınetaqy tóleýin toqtatty,
dep habarlaıdy Ýtro.rý.
Іshki tekserý barysynda áleýmettik saqtandyrýdyń memlekettik qory bul ómirden ótken 1473 adamǵa 1,88 mln. eýro somasynda zeınetaqy tólengenin anyqtaǵan.
Qazirgi tańda qaıtys bolǵan qaı zeınetkerler atyna aqsha tólengeni tekserilip jatyr.
Habarlanǵanyndaı, bul el azamattary tarapynan áleýmettik tólemderge qatysty jasalǵan birinshi qýlyq emes. Buryn Zakınf aralynyń 2 paıyzǵa jýyq halqy zaǵıp adamdarǵa beriletin járdemaqyny alyp kelgen, al keıin bılik sol járdemaqy alatyndardyń biri kólik júrgizip júrgenin, ekinshisi ań aýlaýǵa baryp júrgenin, ıaǵnı olardyń soqyr emes ekendigin anyqtaǵan.
