Grekııa avıatsııa basshysy Afıny áýejaıyndaǵy aqaýdan keıin otstavkaǵa ketti
ASTANA. KAZINFORM — Grekııa Azamattyq avıatsııa basqarmasynyń (HCA) basshysy 4 qańtarda eldiń áýe keńistiginiń birneshe saǵatqa jabylýyna ákep soqqan eskirgen baılanys júıelerine baılanysty týyndaǵan aqaýlardan keıin qyzmetinen ketti, dep habarlaıdy TASS.
— Azamattyq avıatsııa basqarmasynyń basshysy Iorgos Saýnatsos Grekııanyń ınfraqurylym jáne kólik mınıstri Hrıstos Dımasqa otstavkaǵa ketý týraly ótinish tapsyrdy, — delingen mınıstrlik málimdemesinde.
Bul týraly mınıstrlik áýe dıspetcherleri Grekııa áýe keńistigindegi ushaqtardyń ushqyshtarymen baılanysa almaı qalǵan buryn-sońdy bolmaǵan tehnıkalyq aqaýdan keıin 10 kún ótken soń málimdedi.
Saýnatsos 4 qańtar kúni Afıny ushý aımaǵyndaǵy baılanystyń isten shyǵý sebepterin zertteıtin arnaıy komıssııanyń tergeý nátıjeleri jarııalanǵannan keıin qyzmetinen ketti.
Áýe navıgatsııasy basqarmasy dırektorynyń orynbasary Iorgos Vagenas agenttiktiń jańa basshysy taǵaıyndalǵanǵa deıin Azamattyq avıatsııa dırektory qyzmetin atqaratyny habarlandy.
4 qańtarda Afıny men Makedonııa áýe qozǵalysyn basqarý munaralarynyń ortalyq radıobaılanys júıeleri jıilik kedergilerine baılanysty eldiń áýe keńistigindegi barlyq ushaqpen baılanysyn úzdi. Keıin Gretsııadaǵy barlyq reıs birneshe saǵatqa toqtatyldy. Bılik Afınynyń ushý aımaǵyn (FIR) reıster úshin aldyn ala japty. FIR keıinirek «telekommýnıkatsııalyq ınfraqurylymnan shyǵatyn jáne FIR ishinde bir ýaqytta paıda bolǵan tehnıkalyq másele tolyǵymen sheshildi» dep habarlady.
Skai telearnasynyń habarlaýynsha, 4 qańtarda shamamen 70 reıs keshiktirildi, al júzdegen jolaýshy áýejaılarda 10 saǵattan astam ýaqyt boıy qalyp qoıdy. Grekııa qaýipsizdik agenttikterindegi derekkózder telearnaǵa bul jaǵdaıda syrtqy kúshterdiń dıversııasy men kıbershabýyldary joqqa shyǵarylatynyn aıtty.
Grekııa áýe qozǵalysyn basqarýshylar qaýymdastyǵy baılanystyń joǵalýyn «buryn-sońdy bolmaǵan jáne qabyldanbaıtyn jaǵdaı» dep atap, «bul Azamattyq avıatsııa basqarmasynyń áýe qozǵalysyn basqarýshylardyń eskertýlerin júıeli túrde elemeıtin áreketsizdiginiń, biliksiz basqarýynyń jáne qate sheshimderiniń tikeleı nátıjesi» ekenin atap ótti.
Qaýymdastyqtyń málimeti boıynsha, Afıny basqarý munarasynyń radıobaılanys jabdyqtary 1995 jyldan beri jumys istep keledi jáne birneshe ret jańartýdy qajet etti. Jabdyq óndirýshisi oǵan kepildik berýdi toqtatqanyna kóp bolǵan.
2026 jylǵa Afıny halyqaralyq áýejaıynyń ınfraqurylymyn 300 mıllıon eýroǵa kúrdeli jóndeý, sonyń ishinde tsıfrlyq taratqyshtardy jetkizý josparlanǵan. Ótken jyly áýejaı shamamen 34 mıllıon jolaýshyny tasymaldady, bul 2024 jylǵy maqsatpen salystyrǵanda 6,7%-ǵa artyq.
Budan buryn habarlanǵandaı, Afıny ulttyq temirjol keńsesiniń aldynda jarylys boldy.