Grekııa 2021 jyly Qazaq kúresinen Álem chempıonatyn ótkizýge nıet bildirdi
Elordada ótip jatqan Dúnıejúzilik «Qazaq kúresi» federatsııasynyń halyqaralyq kongresinde federatsııasynyń vıtse-prezıdenti bolyp Grekııadan kelgen Pekos Feodoros pen qytaılyq Soń Jıańlıń saılandy. Federatsııa músheleriniń qoldaýyna ıe bolǵan Pekos Feodoros óz usynysyn ortaǵa saldy.
«Mundaı qurmetti ataqty tapsyryp otyrǵan federatsııa basshylyǵyna alǵysymdy bildiremin. Qazaq kúresinde júrgenime birneshe jyl boldy. Bizdiń eldiń basshylyǵy 2021 jyly Qazaq kúresinen Álem jáne Eýropa chempıonatyn Grekııada ótkizýge kelisip otyr. Bárińiz osy bastamamyzdy qoldarsyzdar degen úmittemin», - dedi Pekos Feodoros.
Aıta ketsek, alys-jaqyn shet elderdiń ókilderiniń qatysýymen elordada Dúnıejúzilik «Qazaq kúresi» federatsııasynyń halyqaralyq kongresi ótip jatyr. Jıyn barysynda federatsııa prezıdenti Alık Shpekbaev álemniń 27 elinen kelgen federatsııa múshelerine usynys bildirdi. Ol boıynsha federatsııanyń «Qurmetti prezıdenti» retinde Doshan Joljaqsynovty, birinshi vıtse-prezıdenti retinde Bádelhan Kamalhanulyn saılaý usynyldy. Kópshilik bir aýyzdan qoldady.
