Grekııa 15 jasqa tolmaǵan balalarǵa áleýmettik jelini paıdalanýǵa tyıym saldy
ASTANA. KAZINFORM — Grekııa parlamenti 2026 jylǵy 23 qazanda 15 jasqa tolmaǵan balalardyń áleýmettik jelilerdi paıdalanýyna tyıym salatyn zań jobasyn maquldady. Shekteý 2027 jylǵy 1 qańtardan bastap kúshine enedi, dep habarlaıdy Kazinform agenttiginiń menshikti tilshisi.
Zań jobasyn tek bıliktegi «Jańa demokratııa» partııasy qoldady. Negizgi oppozıtsııalyq kúshter oǵan qarsy daýys berdi nemese qalys qaldy. Talqylaý 16 saǵattan astam ýaqytqa sozyldy.
Qujat platformalardy paıdalanýshylardyń jasyn tekserý tetikterin engizýge mindetteıdi. Ol úshin memlekettik Kids Wallet jáne Gov.gr Wallet qosymshalaryn nemese ulttyq jáne eýropalyq zańnama talaptaryna saı keletin basqa sheshimderdi paıdalanýǵa bolady. Platformalarǵa paıdalanýshynyń 15 jasqa tolǵan-tolmaǵany týraly ǵana aqparat beriledi. Onyń aty-jóni, naqty týǵan kúni jáne basqa da jeke derekteri ashylmaıdy.
Talaptardy oryndamaǵan kompanııalarǵa Eýropalyq odaqtyń Tsıfrlyq qyzmetter týraly zańyna (DSA) sáıkes qatań aıyppul salynady. Onyń mólsheri kompanııanyń jahandyq aınalymynyń 6 paıyzyna deıin jetýi múmkin.
Grekııa premer-mınıstri Kırıakos Mıtsotakıs mundaı tyıym engizý josparyn bıyl sáýirde jarııalaǵan edi. Bılik bul sharany balalardyń psıhıkalyq densaýlyǵyn qorǵaý qajet ekenimen túsindiredi. Olardyń aıtýynsha, áleýmettik jelilerdegi lentany sheksiz paraqtaý balalardyń uıqysyna, zeıinine jáne qurdastarymen aralasýyna kedergi keltiredi. Al platformalardyń algorıtmderi táýeldilik týdyrýy múmkin.
Grekııa Eýropalyq odaqta mundaı shekteý engizgen alǵashqy elderdiń biri atanyp otyr. Buǵan deıin Aýstralııa 16 jasqa tolmaǵan balalarǵa osyndaı tyıym salǵan. Frantsııada osyǵan uqsas zańdy Konstıtýtsııalyq keńes qabyldamaı tastaǵan. Afına bıligi kámeletke tolmaǵandardy tsıfrlyq ortada qorǵaý máselesinde Eýropa elderin ortaq ustanym qalyptastyrýǵa da shaqyryp otyr.
Alǵashqy kezeńde zań Instagram, Facebook jáne TikTok sııaqty platformalarǵa qatysty qoldanylady. Keıin tizim keńeıýi múmkin. Ata-analar balalaryna áleýmettik jelilerdi paıdalanýǵa ruqsat bere almaıdy. Sondaı-aq 15 jasqa tolmaǵan balalardyń burynnan ashylǵan akkaýnttaryna da jeńildik qarastyrylmaǵan.
Eske salaıyq, buǵan deıin Qazaqstanda 16 jasqa deıingi balalardyń áleýmettik jelige kirýin shekteý tetigi ázirlenip jatqanyn jazǵan edik.
