Grek-rımshi Meıirjan Shermahanbet Azııa chempıonatynyń fınalyna shyqty

NUR-SULTAN. QazAqparat - Qytaıdyń Sııan qalasynda kúres túrlerinen Azııa chempıonatynyń sońǵy kúni ótip jatyr. Búgin grek-rım kúresinen bes salmaq dárejesinde sportshylar baqtaryn synaýda. Qazaqstandyq palýan Meıirjan Shermahanbet 67 kelide fınalǵa shyqty, dep habarlaıdy QazAqparat.

QR Ulttyq Olımpıadalyq komıtetinen málim etkendeı, Meıirjan irikteý kezeńinde aldymen qytaılyq sportshyny 9:0 esebimen jeńdi. Shırek fınalda ırandyq Hamed Mýsa Tab esimdi sportshyny tize búktirdi. Jartylaı fınalda sırııalyq Abdýlkarım Al-Hasandy jarys jolynan yǵystyryp, aqtyq synǵa joldama aldy. Endi Meırijan Azııa chempıonatynyń jeńimpazy ataǵyn Ońtústik Koreıa eliniń sportshysy Rıý Han Sýmen sarapqa salady.

Aıta keteıik, taǵy úsh sportshymyz Azııa chempıonatynyń qola medaldary úshin kúresedi. 72 kelide Demeý Jadraev ózbekstandyq Aram Vardanıanmen kilemge shyqsa, 82 kelide Maqsat Erejepov ózbekstandyq sportshy Jalgasbaı Berdımýratovpen kezdesedi. Al 97 kelide Álimhan Syzdyqov ırandyq Mahdı Abbas Alııarıfeızabadımen jolyǵady.

60 kelide el namysyn qorǵaǵan Meırambek Aınaǵúlov birinshi kezdesýinde koreıalyq palýanǵa jeńilip, Azııa chempıonatyn sátsiz aıaqtady.