Grek-rım kúresinen Qazaqstan quramasy aldaǵy maýsymǵa daıyndyqty bastady
ASTANA. KAZINFORM — 2025 jylǵy sporttyq maýsym máresine jetti. Degenmen grek-rım kúresinen Qazaqstan ulttyq quramasy aldaǵy maýsymǵa daıyndyqty bastap ketti.
Bul týraly grek-rım kúresinen ulttyq quramanyń bas bapkeri Qonysbek Kárimuly Olympic.kz saıtyna bergen suhbatynda aıtty.
— Ulttyq qurama buǵan deıin Taılandta qalypqa keltirý jıynyna qatysty. Oǵan Azııa jáne álem chempıonatynda júldege ilikken balýandarymyz bardy. Keıin quramanyń 80%-y Býrabaıdaǵy jalpy dene daıyndyǵyna arnalǵan oqý-jattyǵý jıynyna qatysty. 12-30 qańtar aralyǵynda Túrkistan oblysynda oqý-jattyǵý jıynyn ótkizemiz. Sodan keıin Horvatııanyń Zagreb qalasynda ótetin reıtıngilik týrnırge qatysamyz. Maqsat — arnaıy dene daıyndyǵynan keıingi balýandardyń áleýetin kórý. Jarystan keıin dál sol Horvatııada 9-25 aqpan aralyǵynda birlesken oqý-jattyǵý jıyny ótedi. Sonymen qatar aldaǵy Azııa oıyndaryna elimizde irikteý týrnırin ótkizý josparda bar. Degenmen bul áli naqty emes, - dedi Qonysbek Kárimuly.
Eske sala keteıik, buǵan deıin Halyqaralyq dzıýdo federatsııasy (IJF) Parıj qalasynda ótetin Grand Slam týrnırine qatysatyn ulttyq quramalardyń aldyn ala tizimin jarııalaǵanyn jazǵanbyz.