Grek-rım kúresinen álem chempıonatynyń júldegeri Erjet Jarlyqasynǵa kólik syıǵa berildi
TARAZ. KAZINFORM – Tıranada (Albanııa) grek-rım kúresinen olımpıadalyq emes salmaqtarda ótken álem chempıonatynda kúmis júlde alǵan Erjet Jarlyqasynǵa kólik syıǵa tartty. Al bapkerine qarjylaı sertıfıkat tabys etildi. Bul týraly Jambyl oblysy ákimdiginiń Dene shynyqtyrý jáne sport basqarmasy málim etti.
«Jambyl oblystyq grek-rım, erkin jáne áıelder kúresi federatsııasynyń prezıdenti, sport janashyry Álimbek Ásembekuly kúres túrlerinen Tıranada (Albanııa) ótip jatqan álem chempıonatynan kúmis júlde oljalaǵan jambyldyq Erjet Jarlyqasynǵa sý jańa Toyota Camry avtokóligin jáne jeke bapkeri Asyljan Baızaqovqa 3 000 000 teńgelik sertıfıkat tabys etti», - dedi basqarmadan.
Aıta keteıik, Erjet Jarlyqasyn 63 kelige deıingi salmaqta fınalda ázerbaıjandyq Nıhat Mammadlımen chempıondyq ataqty sarapqa saldy.
Erjet bıyl Azııa birinshiliginde úzdik shyqsa, Nıhat buǵan deıin eki márte Eýropada top jaryp, 2022 jyly 23 jasqa deıingiler arasynda álem chempıonatynyń kúmis júldegeri atanǵan eken.
