Grek-rım kúresinen álem chempıonatynda qazaqstandyq balýandar taǵy eki júlde aldy

ASTANA. KAZINFORM — Grekııa astanasy Afıny qalasynda ótip jatqan grek-rım kúresinen 17 jasqa deıingi jasóspirimder arasyndaǵy álem chempıonatynda el quramasy qorjynyna taǵy bir kúmis, bir qola júlde tústi.

Dúbirli dodada Nurálı Asqar (55 keli) kúmis júldeger atansa, Dosbol Shamıl (65 keli) álem chempıonatynda qola medalǵa ıe boldy.

Álem chempıonatynda budan buryn Nurdáýlet Qumaruly (48 keli) ekinshi oryn alǵan edi.

Endi el quramasynan Jańajol Qýanyshbek (45 keli) fınalda synǵa túsedi.

Sportshylardyń barlyǵy «Kúres túrleri boıynsha olımpıadalyq daıarlaý ortalyǵy» RMQK Jaqsylyq Úshkempirov atyndaǵy jekpe-jek saraıynda tálim alady.

Sondaı-aq bapkerler el quramasy sapynda Bazarbek Danııar (51 keli), Aqon Damır (60 keli), Meıirbekuly Marlen (71 keli), Makhambaev Mardanbek (80 keli), Toıshy Ədilet (92 keli), Sovethan Baqtup (110 keli) sekildi balýandardy alyp barǵan edi.

Álem chempıonaty 27-31 shilde aralyǵynda ótedi.

Aıta ketsek, qazaqstandyq tóreshiler 2025 jylǵy kúres túrleri boıynsha álem chempıonatynda qyzmet atqarady.

Birikken kúres álemi (UWW) jarııalaǵan 2025 jyly Horvatııanyń Zagreb qalasynda ótetin álem chempıonatynda qyzmet atqaratyn tóreshiler qatarynda Igor Lıgaı men Erik Jumabekov bar.