Grek-rım kúresinen QR «Prezıdentiniń Kýbogy» ІІІ halyqaralyq týrnırine álemniń 10 elinen 130-dan astam sportshy kelmek
ASTANA. 16 qarasha. QazAqparat - Erteń, 17 qarasha kúni «Dáýlet» sport kesheninde grek-rım kúresinen QR «Prezıdentiniń Kýbogy» ІІІ halyqaralyq týrnıri jalaýyn jelbiretpek.
QR Sport jáne dene shynyqtyrý isteri agenttigi tóraǵasynyń orynbasary Elsııar Qanaǵatovtyń aıtýynsha, bul dúbirli dodaǵa álemniń Reseı, Iran, Úndistan, Grýzııa, Qytaı, Belarýs, Ońtústik Koreıa, Ózbekstan, Qyrǵyzstan, Tájikstan jáne Qazaqstan elderinen 130-dan astam sportshy keledi.
Qazaqstan qarsylastarynyń arasynda ataqty sportshylar da joq emes. Solardyń biri 2008 jylǵy Beıjińdegi Olımpıada chempıony, 2007 jyly Bakýde ótken Álem chempıonatynyń qola júldegeri reseılik Nazır Mankıev. Ol 60 keli salmaq dárejesinde boz kilemge shyǵady. Sondaı-aq, jarysqa arnaıy qonaq retinde QR Prezıdenti Nursultan Nazarbaevtyń burynǵy jeke bapkeri, QR eńbek sińirgen jattyqtyrýshysy Lev Ejevskıı shaqyrylyp otyr.
Týrnır tuńǵysh ret jeke esepte ótpek. Qalyptasqan dástúr boıynsha jeńimpaz ben júldegerler qomaqty aqshalaı syılyq alady. Birinshi orynǵa 5 myń AQSh dollary, ekinshi orynǵa 3 myń AQSh dollary, al úshinshi orynǵa 1,5 myń AQSh dollary tigilgen.
