Grek-rım kúresinen qazaqstandyq palýan Belarýs quramasyna qola medal alyp berdi
ALMATY. 21 qańtar. QazAqparat - 19-20 qańtar kúnderi Reseıdiń Túmen qalasynda Ivan Poddýbnyıdi eske alýǵa arnalǵan grek-rım kúresinen 52-shi Gran-prı jarystary ótti.
Onda jarystyń alǵashqy kúni 55, 66, 84 jáne 120 kelidegi balýandardyń beldesýi ótti. Al keshe 60, 74 jáne 96 keli sanatyndaǵy jeńimpazdar anyqtaldy. Ókinishke qaraı, qazaqstandyq sportshylar bul jarysta júlde almady. El namysyn qorǵaǵandar: Almat Áýeshov (55 kg), Nurlan Áljanov, Danııar Qalenov (60 kg), Abzal Nurahov, Ibragım Magomadov, Shyńǵys Qaıyrmaǵambetov (66 kg), Hızar Djabraılov, Nıkolaı Nıkıtıýk (74 kg), Andreı Samohın, Tımýr Tashmaǵambetov, Maqsat Baıarystanov (84 kg), Vıtalıı Vasenev, Nıka Tvalabeshvılı (96 kg) men
Gennadıı Lıaşenko (120 kg).
QR Grek-rım, erkin ján áıelder kúresi federatsııasynyń habarlaýynsha, onyń esesine búginde Belarýs týynyń astynda óner kórsetip júrgen jerlesimiz Erbol Qalabaev (60 keli salmaqta) atalmysh eldiń qorjynyna túsken jalǵyz qola medaldiń ıegeri atandy. Bul jarysta jalpy reseılik balýandar 6 salmaqta top jaryp, tek qytaılyq Nı Sıaomınge eń aýyr salmaqta ǵana ese jiberdi. Ózge elderden - belarýstarǵa Erbol Qalabaev, ózbekterge - Rústem Assaqalov (84 kg) bir-bir qola júlde syılady.
