Grek-rım kúresinen bas bapker Olımpıadadaǵy sportshylardyń oıyny úshin keshirim surady

NUR-SULTAN. QazAqparat – Grek-rım kúresinen Qazaqstan quramasynyń bas bapkeri Baqtııar Baıseıitov Tokıo Olımpıadasynda sportshylardyń oıyny úshin qazaqstandyqtardan keshirim surady, dep habarlaıdy QazAqparat.

«Men mundaı oıyn úshin barsha Qazaqstandaǵy jankúıerlerden keshirim suraǵym keledi. Shynymdy aıtsam, meniń ózime de óte yńǵaısyz boldy. Eki jyl buryn ǵana komandany basqarýǵa keldim. Bıyl Azııa chempıonatynda tórt fınalıst shyqqan edi. Biraq bul sport. Bári bolady. Taǵy da keshirim suraımyn. Múmkin maǵan azdaǵan ýaqyt jetpegen shyǵar», - dedi bas bapker Ortalyq kommýnıkatsııalar qyzmetindegi onlaın brıfıngide.

Eske sala ketsek, 2 tamyz kúni 77 kelide Qazaqstan sapynan shyqqan Demeý Jadyraev alǵashqy kezdesýinde-aq jeńilip qaldy.

Búgin 87 keli salmaq dárejesindegi qazaqstandyq balýan Nursultan Tursynov kilemge shyqty. Onyń alǵashqy qarsylasy germanııalyq Denıs Kýdla boldy. Ekeýara kezdesý 4:1 esebimen nemis sportshysynyń enshisine sheshildi.