Grek-rım kúresinen Azııa chempıonaty: Qazaqstandyq balýandar pikir bildirdi
El quramasynan Nursultan Tursynov (87 keli) qurlyqtyq dodada kúmis júldeger boldy.
Al Amanǵalı Bekbolatov (55 keli) pen Muhamedáli Mamyrbek (63 keli), Álimhan Syzdyqov (130 keli) qola júlde aldy.
Azııa chempıonatynda qola júlde úshin beldesýde Amanǵalı Bekbolatov qytaılyq Haıfeng Jangti 9:0 esebimen jeńdi.
«Qurlyqtyq dodada chempıon atanýdy maqsat etken edim. Alaıda, jartylaı fınalda qarsylasyma ese jiberip qoıdym. Meniń tarapymnan belsendi áreketter álsiz boldy. Sol sebepti qola júlde úshin saıysta qarsylasymdy jeńýge tyrystym», - deıdi Amanǵalı Bekbolatov.
Al Muhamedáli Mamyrbek (63 keli) japonııalyq Cheızo Marýıamadan 9:0 esebimen basym tústi.
«Eresekter arasynda alǵashqy júldeme qol jetkizdim. Dese de jarys barysynda biraz qate jiberdim. Aldaǵy ýaqytta sol qatemen jumys jasaımyz. Keleshekte budan da joǵary jetistikke jetemin degen oıdamyn. Qola júlde úshin saıysta japonııalyq qarsylasyma aldyn ala zertteý júrgizdik. Oǵan qarsy tıisti ádis-tásildi qoldandyq. Onyń qatelikterin óz paıdamyzǵa jaratýǵa kúsh saldym», - deıdi Muhamedáli Mamyrbek.
Al Álimhan Syzdyqov (130 keli) 3-oryn úshin beldesýde ońtústik koreıalyq Mınsekok Kımnen 5:2 esebimen basym tústi.
«Koreılik balýannan byltyr Mońǵolııada ótken Azııa chempıonatynyń fınalynda basym túsken edim. Elordadaǵy básekede jolymyz 3-oryn úshin saıysta túıisti. Negizi fınalǵa shyǵýǵa múmkindigim bar edi. Sátsizdik úshin jankúıerlerden keshirim suraımyn. Jartylaı fınalda qytaılyq balýanǵa ese jiberdim. Qate jiberip aldym. Daıyndyǵym jetpegen sekildi. Alda álem chempıonaty men Azııa oıyndary kútip tur. Oǵan qaı balýandy alyp baratynyn bapkerler quramy sheshedi», - deıdi Álimhan Syzdyqov.
Erteń, 10 sáýirde grek-rım kúresinen qalǵan salmaqtarda júldeler sarapqa salynady.
Sondaı-aq, 11-12 sáýirde áıelder, 13-14 cáýirde erkin kúresten saıystar ótkiziledi.
