Grek-rım kúresinen álem chempıonatynda Qazaqstan 13-orynǵa jaıǵasty
NUR-SULTAN. QazAqparat - Serbııa astanasy Belgrad qalasynda ótip jatqan kúres túrlerinen álem chempıonatynda grek-rım kúresinen Aıdos Sultanǵalıdiń qola júldesinen keıin el quramasy medaldar kestesinde 13-orynǵa jaıǵasty, dep habarlaıdy QazAqparat tilshisi.
Qazirge deıin grek-rım kúresinen álemniń 13 memleketinen kelgen balýandar júldege qol jetkizdi.
Olardyń arasynda 4 altyn medal alǵan Serbııa kósh bastap tur. Ekinshi oryndaǵy Ázerbaıjannyń 1 altyn, 1 kúmis, 3 qola medali bar. Úzdik úshtikti 1 altyn, 3 qolamen Túrkııa quramasy túıindedi.
Sondaı-aq, medaldar kestesine Armenııa, Qyrǵyzstan, Grýzııa, Vengrııa, Iran, Ózbekstan, Bolgarııa, Danııa, Ýkraına, Qytaı, Japonııa quramalary engizilgen.
Eske salsaq, álemdik dodada 60 keli salmaqta synǵa túsken Aıdos 3-oryn úshin saıysta vengrııalyq Krıstıan Kechkemetıdi 7:1 esebimen jeńdi.
Aıdos Sultanǵalı 1996 jyly 7 aqpanda Qyzylorda qalasynda dúnıege kelgen. Buǵan deıin 2018 jyly Vengrııa astanasy Býdapesht qalasynda ótken álem chempıonatynda da qola júlde alǵan edi.
Aıta ketsek, búgin áıelder kúresinen tórt qazaqstandyq sportshy synǵa tústi.
