Grek-rım kúresi: Qazaqstandyq Túrkııada top jardy
ASTANA. QazAqparat - Túrkııanyń Ystanbul qalasynda grek-rım kúresinen ótken Vehbı Emre atyndaǵy halyqaralyq týrnır Aıdos Sultanǵalı chempıon atandy, dep habarlaıdy QazAqparat tilshisi.
QR Kúres túrleri federatsııasynyń baspasóz qyzmeti málim etkendeı jyl saıyn ótetin dástúrli jarys bıyl Túrkııa jerinde 36-shy ret uıymdastyryldy. Bıylǵy dodaǵa álemniń 25 elinen eń tańdaýly balýandar qatysty.
Atalǵan týrnırde qazaqstandyq balýandar da baq synap, 1 altyn, 4 qola medal jeńip aldy. Jalǵyz altyn medaldi 60 keli salmaqta el namysyn qorǵaǵan Aıdos Sultanǵalı el qorjynyna saldy. Ol fınaldyq básekede moldovalyq Vıktor Kıobanýdan aılasyn asyrdy. Al, 55 kelidegi Horlan Jaqansha men Janserik Sársenbıev jáne Ibragım Magomedov (72 keli) pen Tamerlan Shadýkaev (77 keli) qola júldege qol jetkizdi.
10 salmaq dárejesi boıynsha ótken jarystyń tórteýinde túrik balýandary top jarsa, Belarýs balýandaryna 2 altyn medal buıyrdy. Al Ázerbaıjan, Qazaqstan, Grýzııa jáne Ýkraına balýandary bir altyn medaldan aldy.
