Grek-rım kúresi: Halyqaralyq týrnırde qazaqstandyq eki balýan altyn medalǵa talasady
Germanııanyń Dortmýnd qalasynda grek-rım kúresinen «Grand Prix of Germany» halyqaralyq týrnıri 12 tamyzda bastaldy. Bıyl 38-shi márte jalaýyn jelbiretken dúbirli dodaǵa 23 memleketten balýandar keldi.
12 tamyzda aldyn-ala beldesýler ótip, fınalǵa joldama alǵan balýandar anyqtaldy.
El quramasynan Marlan Muqashev (55 keli) endi fınalda ýkraınalyq Nıkıta Dementevpen bas júldeni sarapqa salady.
Al Aıdos Sultanǵalıdiń (60 keli) fınaldaǵy qarsylasy - AQSh balýany Eldar Hafızov.
Sondaı-aq, jubanysh beldesýinde Ibragım Magomadov (72 keli) qola júldege talassa, Demeý Jadraev (77 keli) pen Erulan Ysqaqov (97 keli) frantsýz balýandarymen kezdesedi. Taǵy bir balýanymyz Álimhan Syzdyqov (130 keli) lıtvalyq Romas Frıdrıkaspen jubanysh beldesýinde baǵyn synaıdy.
Eske salsaq, kúres túrlerinen álem chempıonatyna qatysatyn qazaqstandyq balýandar belgili boldy.
