Grek-rım kúresi: Azııa chempıony Ibragım Magomadov jeńisi jóninde pikir bildirdi
ASTANA. QazAqparat - Astana qalasynda ótip jatqan grek-rım kúresinen eresekter arasynda Azııa chempıonatynda «altyn» alǵan qazaqstandy Ibragım Magomadov júldesi jóninde pikir bildirdi, dep habarlaıdy QazAqparat tilshisi.
Ibragım Magomadov (72 keli) ırandyq Saıad Álı Imentalabfomanımen sheberlik baıqasty. Ol qarsylasynan 5:2 esebimen basym tústi.
«Týǵan elimde chempıon atanǵanyma qýanyshtymyn. Beldesý aldynda qarsylasym jaıynda málimet jınadym. Myqty jáne álsiz tustaryn zerttedim. Fınalǵa daıyn bolyp keldim. Jeńiske jetkenime qýanyshtymyn. Óz jeńisimdi barlyq qazaqstandyqtarǵa, jankúıerlerge arnaımyn. Ózime qoldaý bildirgen otbasyma da rızashylyǵymyz sheksiz. Endi alda álem chempıonaty kútip tur. Soǵan daıyndalamyn», - dedi Ibragım Magomadov.
Ibragım Magomadov 1991 jyly dúnıege kelgen. Qazirge deıin 2020 jyly Azııa chempıonatynda qola alǵan edi.
Grek-rım kúresinen álem chempıonatynda el quramasynan Dıas Qalen (82 keli), Nursultan Tursynov (87 keli) kúmis júldeger bolsa, Amanǵalı Bekbolatov (55 keli) pen Muhamedali Mamyrbek (63 keli), Almat Kebispaev (67 keli), Oljas Syrlybaı (97 keli), Álimhan Syzdyqov (130 keli) qola júlde aldy.
