Grek-rım kúresi: Astanada altyn buıyrmady
ASTANA. 19 qarasha. QazAqparat - Astana tórinde grek-rım kúresinen Prezıdent kýbogy jolyndaǵy báseke aıaqtaldy.
Bul synnan Qazaqstanǵa altyn buıyrǵan joq. Bul jaıynda búgin alaman.kz habarlap otyr.
Altyn alady degen Almat Kebispaev (60 kg) kúmispen kúpteldi. Ol fınalda koreıalyq Seng Jaı Výdan jeńilip qaldy. Al osy salmaqtaǵy Azııa chempıony, Qazaqstan chempıony Erbol Qońyratov qolany qanaǵat tutty.
74 keli salmaqta Dosjan Qartyqov fınalda orys Konstantın Shıraevtan jeńildi. Maqsat Erejekov qola aldy.
96 kelide Erlan Ysqaqov ta fınalǵa shyqqanymen, reseılik Nıkıta Melnıkovtan utylyp qaldy.
Aıta keteıik, Astanada Grek-rım kúresinen Qazaqstan Respýblıkasy Prezıdentiniń Kýbogy úshin 3-shi halyqaralyq týrnır uıymdastyrylǵan bolatyn. Atalǵan básekede álemniń 10 memleketinen kelgen 135 palýan baq synady. Sonymen qatar, bul sharaǵa Azııa kúres federatsııasynyń prezıdenti Kım Chang Kıý arnaıy keldi.
