Grek kásipodaqtary 24 saǵattyq ereýil ótkizýde
ASTANA. Mamyrdyń 20-sy. QazAqparat - Grekııanyń memlekettik jáne jekemenshik sektorlarynyń iri kásipodaqtary úkimet josparlap otyrǵan saqtandyrýshy zeınetaqy júıesindegi ózgertýlerge qarsy búgin 24 saǵattyq jalpyhalyqtyq ereýil jarııalady,
dep habarlaıdy ITAR-TASS agenttigi.
Ereýildiń barysynda memlekettik vedomstvolar men kásiporyndar, bankter, salyq ınspektsııalary, ýnıversıtetter men mektepter, sottar men advokattyq kontoralar 1 táýlikke jumystaryn toqtatady. Aýrýhanalar naýqastardy tek shuǵyl jaǵdaılarda ǵana qabyldaıdy.
Afınyda barlyq qoǵamdyq kólik bir táýlikke jumystaryn toqtatady, tek qala mańyna qatynaıtyn elektr poıyzy ǵana jergilikti ýaqyt boıynsha saǵat 10.00-nan 16.00-ǵa deıin jumys isteıtin bolady (máskeý ýaqyty boıynsha 11.00 men 17.00-niń aralyǵynda). Poıyzdar da bir táýlikke qozǵalystaryn toqtatady, aılaqtarda kemeler zákirge turady. Ereýilge tek grek áýe dıspetcherleri ǵana qatyspaıdy.
Kásipodaqtar saqtandyrýshy zeınetaqy júıesine irgeli ózgertýler engizýge baǵyttalǵan Grekııa úkimetiniń zań jobasyna narazylyq bildirýde. Zań jobasy boıynsha 2013 jyldan bastap zeınetaqyny esepteýdiń biryńǵaı júıesi qarastyrylyp, saqtandyrýshy barlyq qordy úsh qorǵa - jumysshylar men qyzmetkerlerdiń, sharýalardyń jáne erkin kásip ıeleriniń (dárigerler, advokattar, t.b.) qorlaryna biriktirýdi belgilep otyr. Sondaı-aq zeınet jasy 65 jasqa deıin kóterilmek. Zeınetke erkin shyǵý baǵdarlamasy alyp tastalyp, zeınetke merziminen buryn shyǵyp kelgen aýyr kásipterdiń tizimi ózgertildi.
