Grek fermerleri joldy bógep, MERCOSUR kelisiminen bas tartýdy talap etti

ASTANA. KAZINFORM — Grek fermerleri úkimetten sýbsıdııa berýdi jáne Eýropalyq Odaqtyń MERCOSUR elderimen erkin saýda kelisiminen bas tartýdy talap etip otyr, dep habarlaıdy Report. 

Olar avtokólik joldaryn jaýyp, kórshi eldermen shekaradaǵy keden beketterin qorshaýdy kúsheıtti. 

Fermerler elde 6 qańtarda ótetin shomyldyrý rásiminen keıin narazylyq aktsııasyn kúsheıtý týraly sheshim qabyldady.

Olardyń aıtýynsha, 8-9 qańtar kúnderi fermerler Bralos beketin traktor jáne kóliktermen jabady. Osylaısha olar Grekııany ekige bólmek. Sonymen qatar Afına — Salonıkı ulttyq avtojolyn, Egnatııa, Ionııa, Sıatısta qalasynyń mańyndaǵy tas joldarda Batys Makedonııa jáne Peloponnes túbeginde qıylystardy jabýdy jalǵastyrady. Sondaı-aq, Evzonı, Nıkı, Promahonas, Eksohı, Ormenı jáne Kıpı keden beketterinde, sondaı-aq eldiń biraz aýdandaryndaǵy kishigirim joldarǵa blok qoıý jalǵasady.

— Beısenbi jáne juma kúnderi bizdiń jalpy jumyldyrýymyz kúsheıedi. Sonda úkimettiń naqty dıalog qurýymyz úshin sheshimder usynýǵa múmkindigi bolady. Eger olar qalasa, erteń-aq bizdi shynaıy usynystarmen maǵynaly dıalogqa shaqyra alady, osylaısha biz úıge oralyp, osy blok qoıýdy birjola toqtata alamyz, — dedi E65 avtojolyndaǵy baqylaý-ótkizý pýnktiniń ókili Kostas Tsellas.

Byltyr qarasha aıynda grekııalyq temirjolshylar saladaǵy ózekti máselelerdi sheshýdi talap etip, el boıynsha 24 saǵattyq ereýilge shyqty.