Green Card–2027 lotereıasy: AQSh jańa talaptar engizedi

ASTANA. KAZINFORM — United States Department of State Diversity Visa baǵdarlamasyna (Green Card lotereıasy) qatysý erejelerin kúsheıtetin jańa talaptardy engizedi. Bul ózgerister 10 sáýirden bastap kúshine enedi jáne vedomstvonyń resmı saıtynda jarııalanǵan.

Negizgi jańalyqtardyń biri – ótinish berýdiń bastapqy kezeńinde qujattardyń tsıfrlyq kóshirmelerin usyný mindetti bolady. Bul shara alaıaqtyqpen kúresti kúsheıtip, qatysýshylardy sáıkestendirýdi jeńildetýge baǵyttalǵan.

Jańartylǵan talaptarǵa sáıkes, endi úmitkerler tek jaramdy sheteldik pasporttyń derekterin kórsetip qana qoımaı, pasporttyń jeke derekteri men ıesiniń qoly bar betteriniń skan-kóshirmelerin júıege júkteýi tıis. Bul qujattarsyz tirkeý múmkin bolmaıdy.

Sonymen qatar anketa termınologııasyna da ózgerister engizildi. Buryn qoldanylǵan keń uǵymdardyń ornyna naqty anyqtamalar paıdalanylady:

• «gender» degen baǵan «jynys» dep ózgertiledi;

• «jas» baǵanynyń ornyna naqty týǵan kúni kórsetilýi kerek.

Bul ózgerister baǵdarlamadaǵy qarjylyq reformalardy da tolyqtyrady. Eske salsaq, 2025 jyldyń qyrkúıeginen bastap lotereıaǵa tirkelý úshin 1 dollar kóleminde mindetti tólem engizilgen. Buǵan deıin ótinish berý tegin bolǵan.

AQSh bıligi bul qadamǵa jalǵan ótinishterdiń kóbeıýi jáne ótken jyldyń jeltoqsanynda vızalardyń ýaqytsha toqtatylýy sııaqty jaǵdaılarǵa baılanysty barǵan.

Jańa erejeler **Diversity Visa Program arqyly 2027 jylǵa arnalǵan Green Card alýǵa úmitker barlyq qatysýshylarǵa qatysty bolady.

Aıta keteıik, buǵan deıin Green Card lotereıasyna qatysý aqyly bolatynyn jazdyq.